Украинада илк бор ҳарбий асирни ўлдирган россияликка ҳукм чиқарилди

Запорижжя шаҳри суди россиялик ҳарбий Дмитрий Курашовни ҳарбий асирни ўлдиргани учун умрбод қамоқ жазосига ҳукм қилди. Ҳукм 6 ноябр куни эълон қилинди, деб хабар бермоқда Deutsche Welle.

2024 йил январ ойида «Шторм-V» отрядининг таркибида 26 ёшли Курашов ҳам бўлган бир гуруҳ ҳарбийлари Запорижжя областининг Приютное қишлоғи яқинидаги Украина позицияларига ҳужум қилади. Айблов версиясига кўра, россияликлар позицияни эгаллаб олгач, украиналик ҳарбийлардан бири блиндаждан чиқиб, қўлларини кўтарган. Курашов ундан тиз чўкишни талаб қилган, украиналик ҳарбий унинг буйруғига бўйсунган, шундан сўнг россиялик ҳарбий унга камида уч марта ўқ узган. Кўп ўтмай Украина ҳарбийлари позицияни қайтариб олади, натижада Курашов ва унинг тўрт нафар хизматдоши асирга олинади.

Суд жараёни давомида Курашов украиналик асирни россиялик ҳарбий шифокор ўлдиргани, у ўз ҳаракатини ярадор украиналикни даволашнинг иложи йўқлиги билан изоҳлаганини айтган. У гўёки ўша ҳарбий шифокорнинг ўзи ҳам кўп ўтмай ҳалок бўлганини таъкидлаган. Бироқ, воқеага гувоҳ бўлган бошқа россиялик ҳарбийлар украиналик қуролсиз аскар қўл кўтариб чиққанда унга қарата айнан Курашов ўқ узгани ҳақида кўрсатма беришган.

Курашов суд жараёнида айбига иқрор бўлди – кейинроқ у журналистларга келажакда асирлар алмашинуви доирасида Россияга қайтиш учун жараённи тезлаштириш мақсадида шундай қилганини айтди.

Украинадаги «Бешинчи канал»да қайд этилишича, бу россиялик ҳарбий хизматчи украиналик ҳарбий асирни ўлдиргани учун умрбод қамоқ жазосига ҳукм қилиниши билан боғлиқ биринчи ҳолат.

Бунгача Украина судлари тинч аҳолини ўлдиргани учун асирга олинган россияликларга бир неча марта умрбод қамоқ жазосини тайинлаган эди. Маълум бўлган ҳукмларнинг биринчиси 2022 йил май ойида чиқарилган – россиялик ҳарбий Вадим Шишимарин Суми областида 62 ёшли фуқаросини ўлдиргани учун умрбод қамоқ жазосига ҳукм қилинганди. Апелляция натижаларига кўра, жазо муддати 15 йилга қисқартирилган.

Тинч аҳолини ўлдирганлик учун умрбод қамоқ жазоси охирги бор шу йил август ойида чиқарилганди. Айблов версиясига кўра, 2024 йилда Купянск яқинида Нижний Новгород колониясидан сафарбар қилинган 21 ёшли Артем Куликов командири буйруғи билан маҳаллий аҳоли вакиллари бўлган икки кишини отиб ўлдирган – россиялик ҳарбийлар улардан Украина қуролли кучлари жойлашув ҳақида маълумот олишнинг имкони бўлмаганидан кейин шундай қарорга келишган.