Мбаппе – можаро марказида. У класикога тайёрланиш ўрнига таътилга кетди ва жамоадошларини ғазаблантирди

«Реал» ҳужумчиси Килиан Мбаппе класико арафасида Италияга кетиб қолгани учун кескин танқидга учради, деб ёзмоқда Испания ва Франциядаги нашрлар. Ушбу форвард жароҳатланган ва бўш вақтида таътилга йўл олганди, аммо бу уни таъна-дашномлардан қутқара олмади – жамоа бош мураббийи Алваро Арбелоа уни ҳимоя қилиб чиқишига тўғри келди.

Баҳсларга сабаб бўлган сафар

Мбаппе 24 апрел куни «Бетис»га қарши кечган ўйинда (1:1) тизза ости пайини шикастлаб олганди. Клубдагилар 27 ёшли форвард қачон сафга қайтишини маълум қилмаган. Айрим маълумотларга кўра, у мавсум охиригача майдонга туша олмаслиги мумкин, бошқа манбалар эса унда «Барселона»га қарши 10 май куни ўтказиладиган класикода ўйнаш имконияти борлигини айтишган.

Аммо француз футболчиси, афтидан, жароҳати ҳақида унчалик жиддий қайғурмаяпти – у кўнглини ёзишга қарор қилди ва севгилиси, актриса Эстер Экспозито билан Калярига йўл олди.

Marca ва L'Equipe нашрлари маълумотига кўра, сўнгги вақтларда франциялик юлдузнинг айрим жамоадошлари, жумладан, Винисиус Жуниор билан муносабатлари ёмонлашган. Ва клуб учун қийин паллада Италияга кетиб қолиши унинг кийим алмаштириш хонасидаги ҳолатини янада ёмонлаштирган. «Реал»дагилар унинг класикогача жароҳатидан тузалиш имконияти бўлганидан келиб чиқиб, тикланиш вақтида бундай йўл тутишни яхши ғоя деб ҳисоблашмаяпти.

Форвардни фанатлар ҳам танқид қилишмоқда. Италияга саёҳат ҳақидаги янгиликлар фонида мадридликлар клуби ҳимоячиси Фран Гарсиянинг француз жамоадоши ҳақида айтган сўзлари яна кенг айланмоқда.

«Биласизки, бугун битта футболчи машқ қилмаслиги, тўп ортидан югурмаслиги мумкин. Аммо бир вақтнинг ўзида бир неча ўйинчи бу билан шуғулланмаса, бу чемпионатда, Чемпионлар лигасида ғалаба қозониш имкониятига жиддий таъсир кўрсатади. Ўйлайманки, агар Килиан тер тўкиб ишласа, у жамоанинг қолган аъзоларига катта ёрдам берган бўлади», – деганди Гарсия январ ойидаёқ El Camino de Mario каналига.

Ҳимоячи интервюсида Мбаппе ҳақида бошқа кўп илиқ сўзлар айтган бўлса-да, мухлислар тушунарли сабабга кўра айнан шу иқтибосни эслаб қолганди. Ҳозир эса бу гаплар яна долзарблашди ва ижтимоий тармоқларда фаол тарқалмоқда.

Фанатлар «Реал» раҳбариятидан Мбаппедан қутулиш талаб қилингна петиция очишган. Икки кун ичида уни аллақачон 14 миллиондан ортиқ киши имзолаган.

Шу билан бирга, жамоа ихтиёрига қайтганидан кейин форвард ўзига дам олиш кунлари олмаган. AS хабарига кўра, у бошқа футболчиларга дам берилган вақтда физиотерапевт ва тикланиш бўйича мутахассислар билан ишлаш учун «Реал» базасига келган.

Яқин вақтлар ичида Килиан МРТ текширувидан ўтади ва шундан кейин унинг «Барселона»га қарши ўйиндаги иштирокига ойдинлик киритилади.

Бу вақтда эса футболчининг тарафдорлар унинг «Реал»да қолиши ҳақида петиция бошлаган ва уни ҳам 10 миллиондан ортиқ киши имзолаган.

«Садоқатига шубҳа қилмайман»

«Реал» бош мураббийи Алваро Арбелоа юлдузли футболчисига қаратилган танқидларга муносабат билдирди.

«Мбаппе бошқа ҳар қандай футболчи каби бўш вақтида хоҳлаган ишини қилиши мумкин. Мен бунга аралашолмайман. Винисиуснинг садоқати уникидан кучлироқми? Таққослаб ўтирмайман. Менимча, бизга ҳамма керак. Мен мураббийлик курсисини эгаллаганимдан бери доим шуни айтаман: ҳар қандай ўйинда ғалаба қозониш учун ҳар бир футболчининг фидойилиги керак.

«Реал» смокингда майдонга тушадиган ўйинчилар билан эмас, балки тер ва лойга ботган футболкаларда ўйинни якунлайдиган ўйинчилар билан яратилган. Бу ажойиб клубда эканимиз ҳаммамизнинг омадимиз келгани. «Реал»дан муҳимроқ футболчи йўқ. Лекин мен ўз шогирдларимнинг садоқатига шубҳа қилмайман», – дея Арбелоанинг сўзларини келтирган Diario AS.

Испаниялик мутахассис Мбаппенинг «Барселона» билан ўйиндаги иштироки ҳозирча сўроқ остида эканини қўшимча қилган.

«Килиан ўйнайдими? Кўрамиз, у ўзини қандай ҳис қиларкан. Ўтган ҳафтадаги тестлар тикланиш жараёни кўпроқ вақтни олишини кўрсатганди», – деган мутахассис.

Мбаппе жароҳатини даволаётган маҳалда «Реал» натижалари учун бутун масъулият юки Винисиуснинг зиммасига тушмоқда. Ва бразилиялик вингер ҳам уялтирмаяпти – у ўтган турда «Эспанёл» билан ўйинда дубл муаллифи бўлди (2:0) ва мураббийдан катта мақтов эшитди. Арбелоа ўйиндан кейин унинг жамоага таъсири ортиб бораётганини эътироф этди.

Шундай паллада яна бир қизиқарли янгилик пайдо бўлди: журналист Франсуа Галлардонинг маълумотига кўра, Килианнинг онаси ва агенти ҳисобланган Файза Ламари гўёки Мадрид клуби президенти Флорентино Пересга ултиматум қўйган ва ёзда Винисиусни сотиб юборишни талаб қилган.

Чемпионат якунига тўрт тур қолганида «Реал» турнир жадвалида 77 очко билан иккинчи ўринда жойлашган ва «Барселона»дан 11 очкога ортда қолмоқда. Чемпионлик масаласи класикода узил-кесил ҳал бўлиши мумкин.