«Ливерпул» «Реал»га имкон қолдирмади, «Арсенал» ва «Бавария»ни тўхтатиб бўлмаяпти

«Ливерпул» – «Реал» 1:0
Гол: Макаллистер, 61 (1:0)
«Ливерпул»: Мамардашвили, ван Дейк, Конате, Робертсон (Керкез, 88), Брэдли, Гравенберҳ, Макаллистер (Жонс, 79), Собослаи, Вирц (Киеза, 88), Салоҳ, Экитике (Гакпо, 79)
«Реал»: Куртуа, Эдер Милитау, Ҳаусен, Каррерас, Валверде (Диас, 90), Камавинга (Родригу, 69), Тшуамени, Винисиус Жуниор, Арда Гулер (Александр-Арнолд, 81), Беллингҳэм, Мбаппе
Огоҳлантиришлар: Макаллистер, 52 – Винисиус Жуниор, 23. Ҳаусен, 45. Беллингҳэм, 60. Каррерас, 90

«Реал» Чемпионлар лигасидаги ғалабали сериясини тўхтатиб, «Энфилд»да мағлубиятга учради. «Ливерпул»га қарши ўйинда меҳмонлар деярли хавфли вазият ярата олишмади. Мезбонлар кучли прессинг уюштириб, биринчи бўлимнинг ўзида бир қанча хавфли ҳужумлар уюштиришди – фақат Тибо Куртуанинг қаҳрамонлиги жамоани голлардан қутқариб турди. 32-дақиқада эса «Ливерпул» пеналти тепиши мумкин эди: Доминик Собослаининг зарбасидан кейин тўп Орелен Тчуаменининг қўлига тегди.

Ҳакам Иштван Ковач эса тўп билан контакт жарима майдони ташқарисида бўлган деб топди ва жарима зарбаси белгилашга қарор қилди, видеотакрорда эса тўп чизиқдан ичкарида бўлганини кўриш мумкин эди.

Лекин бу ҳолатда мадридликлар футболчисининг қўли табиий ҳолатда бўлган деб топилди ва хавфли жарима зарбаси ҳам бекор бўлди.

Иккинчи бўлимда ўйин картинаси ўзгармади. «Ливерпул» устунлик қилди ва бу 61-дақиқада голга айланди: жарима зарбасидан кейин Алексис Мак Аллистер ҳисобни очди. Хаби Алонсо футболчиларни алмаштиришга кечикди. Ҳолбуки Винисиус ва Килиан Мбаппе умуман майдонда кўзга ташланмаётганди. Ўйин охирида эса мезбонлар иккинчи голни уришга яқин келишди, бу сафар Куртуа Эдер Милитао билан биргаликда хавфни бартараф этди. Мезбонлар жами зарбалар сони бўйича яққол устунликка эришди – 17:8.

Инқироздан чиқа бошлаган «Ливерпул» анчадан буён илк бор қаторасига икки ўйинда ғалаба қилди: ўтган ҳафта охирида АПЛда «Астон Вилла» 2:0 ҳисобида мағлуб этилганди. Ундан олдинги етти ўйинда олти мағлубият қайд этилганди. Слот шогирдларининг ЕЧЛдаги ишлари ёмон эмас: тўрт турдан кейин тўққиз очко жамғарилган.

«Реал» эса қаторасига олти ғалабадан кейин илк мағлубиятини тан олишга мажбур бўлди. Бу оралиқда «Юве» ва «Барса» каби кучли рақиблар устидан қозонилган ғалабалар бўлганди (умумий тўплар нисбати 16:2). Бу мадридликларнинг мавсумдаги иккинчи мағлубияти бўлди: «Атлетико»га қарши ўйинда 2:5, «Ливерпул»дан 0:1. Хаби Алонсо ҳозирча топ-жамоаларга қарши чора топа олмаяпти.

Кейинги турда «Ливерпул» ПСВни қабул қилади, «Реал» «Олимпиакос» майдонига сафар қилади.

Диасда дубл ва қизил

«ПСЖ» – «Бавария» 1:2
Голлар: Диас, 4 (0:1). Диас, 32 (0:2). Жоау Невеш, 74 (1:2)
«ПСЖ»: Шевале, Маркиниос, Пачо, Нуну Мендеш, Ҳакими (Маюлу, 45+7), Витиня, Руис (Жоау Невеш, 66), Заир-Эмери, Барколя (Рамуш, 66), Кварацхелия, Дембеле (Ли Кан Ин, 25)
«Бавария»: Нойер, Упамекано, Та, Станишич, Лаймер, Киммиҳ, Павлович, Гнабри (Бишоф, 46), Диас, Олисе (Ким Мин Жэ, 81), Кейн (Горецка, 88)
Огоҳлантиришлар: Нуну Мендеш, 84 – Бишоф, 47. Нойер, 49. Станишич, 84
Четлатиш: Диас, 45

«Бавария» «ПСЖ» майдонида иккинчи бўлимда бир киши кам бўлиб ўйнади, лекин ғалабани сақлаб қоди – 2:1.

Биринчи бўлим охирида Луис Диас жамоадошларини қийин аҳволда қолдириб кетди. Шу билан бирга, айнан унинг саъй-ҳаракатлари эвазига мюнхенликлар ҳисобни қулай кўринишга келтириб олганди: колумбиялик ҳужумчи 4-дақиқада ҳисобни очганди – бу ҳужумда Майкл Олисе Нуну Мендешнинг хатосидан фойдаланиб, зарба берди, дарвозабондан қайтган тўпни Диас тўрга киритиб юборди. «ПСЖ» 22-дақиқада жавоб қайтарди, аммо Усмон Дембеленинг голи офсайд туфайли бекор қилинди.

Кейин эса парижликларда муаммолар давом этди: биринчидан, Усмонни захирага олишга тўғри келди. «Олтин тўп» соҳиби жароҳатидан тўлиқ соғаймасдан майдонга тушганди ва бу қимматга тушди.

Ўн дақиқа ўтиб «Бавария» яна бир гол урди: бу сафар Диас Маркиноснинг сусткашлигидан фойдаланди. «ПСЖ» биринчи бўлимнинг ўзида учинчи тўпни олиб чиқиши мумкин эди, аммо меҳмонлар бир неча вазиятда уларни кечиришди. Танаффус арафасида эса Диас антиқаҳрамонга айланди, у Ашраф Ҳакимига қарши ўта қўпол ўйнади ва қизил карточка олди.

Марокашлик ҳимоячи ҳам кўзда ёш билан майдонни тарк этди.

Иккинчи бўлимда «ПСЖ» сон жиҳатдан устунлик эвазига тўпга эгалик қилди ва босим уюштирди. Аммо бу фақат бир гол учун етарли бўлди – Жоау Невеш 74-дақиқада ҳисобни қисқартирди. «Бавария» озчилик бўлиб ҳужумларга дош берди ва якунда ғалабали ҳисобни сақлаб қолди. Венсан Компани шогирдлари бу мавсумда илк бор ҳимояга ётди ва буни уддалади.

«Бавария» жорий мавсумда барча ўйинларда ғалаба қозонмоқда: дуранг ҳам, мағлубият ҳам йўқ. Барча турнирлар доирасида 16 ўйинда ғалаба. Бу оралиқдаги умумий ҳисоб – 59:11.

«ПСЖ» эса сентябрдан буён илк бор ютқазди: ўшанда жамоа «Марсел»га сафарда 0:1 ҳисобида ютқазган, шундан кейин саккиз ўйиндан иборат мағлубиятсиз серия қайд этганди. Шу билан бирга, бу оралиқда учта ўйинда дуранг бўлган: «Лилл» ва «Лорян» билан ўйинларда 1:1, «Страсбур»га қарши 3:3.

Кейинги турда «Бавария» Лондонда «Арсенал» меҳмони бўлади, «ПСЖ» «Тоттенҳэм»ни қабул қилади.

«Канонирлар»да «қуруқ» ўйинлар серияси

«Славия» – «Арсенал» 0:3
Голлар: Сака, 32 – пеналти (0:1). Мерино, 46 (0:2). Мерино, 68 (0:3)
«Славия»: Маркович, Халоупек, Зима, Влчек (Чам, 70), Зафейрис (Дудера, 70), Садилек, Мбоджи, Мозес (Хасиока, 74), Санянг (Кушей, 74), Провод, Хори (Хитил, 48)
«Арсенал»: Райя, Салиба, Габриэл Магаляйнс, Инкапие (Уайт, 73), Тимбер (Люис-Скелли, 73), Норгар, Райс (Ҳарриман-Анноус, 81), Нванери (Эзе, 65), Троссар (Доуман, 73), Сака, Мерино
Огоҳлантиришлар: Зафейрис, 70. Дудера, 83. Мбоджи, 90 – Нванери, 24. Мерино, 37. Нергор, 75. Люис-Скелли, 79

Таркибдаги жароҳатлар туфайли Прагадаги ўйинда аралаш таркибни туширган Микел Артета бу сафар ҳам стандарт вазиятлардан фойдаланиб, натижага эришди. Бу сафар бурчак зарбасидан гол урилмади, аммо айнан корнердан кейин «канонирлар» пеналти тепиш ҳуқуқига эга бўлди ва Сака ҳисобни очди. У лондонликларнинг ЕЧЛда қаторасига тўрт сафар ўйинида гол урган илк футболчисига айланди.

Иккинчи бўлимда эса яна марказий ҳужумчи позициясида ҳаракат қилган Микел Мерино ўйин тақдирини ҳал қилди. Дастлаб қарши ҳужумда мезбон ҳимоячилар уни жарима майдонида ёлғиз қолдиришди ва испаниялик яримҳимоячи Троссарнинг узатмасини осонлик билан голга айлантирди. Бўлим давомида яна бир стандарт вазият лондонликларга гол олиб келди. Райснинг узатмасидан кейин Мерино тўп учун курашда дарвозабондан устун келди ва боши билан дарвоза тўрини ишғол этди. Шундан кейин Артета тарихий ўзгаришни амалга оширди. Нванери ўрнига майдонга тушган Доуман (15 ёшу 308 кунлик) ЕЧЛ тарихидаги энг ёш футболчига айланди.

Ўйин охирларида ҳакам меҳмонлар дарвозасига пеналти белгилади, аммо VAR аралашувидан кейин қоидабузарлик йўқлиги маълум бўлди. Шу тариқа, «канонирлар» қуруқ сериясини давом эттирадиган бўлди – жамоа барча турнирлар доирасида саккиз ўйиндан буён гол ўтказмасдан ғалаба қозониб келмоқда. Клуб бу орқали ўз тарихидаги янги рекордни ўрнатди (олис 1903 йилда ҳам жамоа кетма-кет саккиз учрашувда гол ўтказмаган, аммо ҳозиргидан фарқли равишда бу ўйинларнинг барчасида ҳам ғалаба қозонилмаган).

Умуман олганда, «Арсенал» бу мавсумда ҳимояда ўта ишончли ўйнамоқда – 33:3. ЕЧЛнинг кейинги турида ёки «Бавария» илк бор очко йўқотади, ёки «Арсенал» қуруқ сериясини тўхтатади.

«Тоттенҳэм» – «Копенҳаген» 4:0
Голлар: Жонсон, 19 (1:0). Одобер, 51 (2:0). ван де Вен, 64 (3:0). Палиня, 67 (4:0)
Аниқ ижро этилмаган пеналти: Ришарлисон, 90’
«Тоттенҳэм»: Викарио, Ромеро (Дансо, 73), ван де Вен, Удоджи (Спенс, 73), Порро, Сарр, Бентанкур, Симонс (Палиня, 61), Одобер (Скарлетт, 80), Жонсон, Коло Муани (Ришарлисон, 73)
«Копенҳаген»: Котарски, Габриэл Перейра (Гарананга, 72), Хатзидиакос, Лопес, Судзуки, Лерагер, Клем, Ашури (Роберт, 76), Ларссон (Дадасон, 46), Мукоко (Классон, 72), Эл-Юнусси (Корнелиус, 72)
Огоҳлантиришлар: Коло Муани, 39 – Габриэл Перейра, 15. Судзуки, 62. Лерагер, 90
Четлатиш: Жонсон, 55

Лондондаги ўйин «Копенҳаген» дарвозабони Котарски учун даҳшатли тушга айланди, унинг икки қўпол хатоси амалда ўйин тақдирини ҳал қилди. Аввалига хорватиялик посбон ўзига қаттиқ ишониб юбориб, жарима майдони ташқарисига югуриб чиқди ва Жонсон бўш дарвозани ишғол этди. Кейин эса Коло Муанининг босими остида тўпни йўқотди ва тўпга эга чиққан Одобер иккинчи голни урди. Иккинчи бўлимда Жонсон майдондан четлатилиши ҳам данияликларни йирик ҳисобдан қутқариб қололмади ва «шпорлар» бир киши кам ҳолатида яна иккита гол уришди. Аввалига ҳимоячи Микки ван де Вен деярли бутун майдонни тўп билан босиб ўтиб, дарвозабонни ҳам доғда қолдирди ва турнинг энг чиройли голини урди.

Эндиликда у олти гол билан Томас Франк жамоасининг энг яхши тўпурари бўлиб турибди. Уч дақиқа ўтиб Палиня ҳисобдаги фарқни оширди. Ўйин охирида мезбонлар бешинчи голни ҳам уриши мумкин эди, аммо Ришарлисон пеналтидан фойдалана олмади, унинг кучли зарбасидан кейин тўп дарвоза тўсинига борди.

«Наполи» – «Айнтрахт» 0:0
«Наполи»: Милинкович-Савич, Буонджорно, Ррахмани, Гутеррес, Ди Лоренцо, Лоботка (Ланг, 74), Мактоминай, Замбо Ангисса, Элмас, Политано (Нерес, 65), Ҳойлунд
«Айнтрахт» Ф: Цеттерер, Кох, Теат, Коллинз, Шаиби (Аменда, 90+3), Ларссон (Схири, 79), Браун (Дауд, 90+3), Кристенсен, Баойя (Кнауфф, 65), Гётце, Буркардт
Огоҳлантиришлар: Ррахмани, 50. Гутеррес, 90

Бу сафар «Айнтрахт» ўзига хос бўлмаган прагматик ўйин намойиш этди. Олдинги турларда «Атлетико» ва «Ливерпул»дан 5 тадан гол ўтказиб юборган ҳамда 3 турдан кейин «Аякс» билан бирга энг кўп гол ўтказиб юборган (11) икки жамоадан бири бўлиб турган «бургутлар» жамоаси уч марказий ҳимоячи билан майдонга тушди ва мақсадига эришди. Меҳмонлар ўйин якунида ғалабани илиб кетиши ҳам мумкин эди, аммо Кнауфф яқин масофадан йўллаган зарба тўғри дарвозабон Ваня Милинкович-Савич томон борди. Шу билан бирга, немислар дарвозабони Зеттерер ўйиннинг қўшимча дақиқаларида Ҳойлунднинг хавфли зарбасини бартараф этиб, жамоаси учун дуранг ҳисобни сақлаб қолди.

«Ювентус» – «Спортинг» 1:1
Голлар: Араухо, 12 (0:1). Влаҳович, 34 (1:1)
«Ювентус»: Ди Грегорио, Гатти, Копмейнерс, Калюлю, Локателли (Аджич, 83), Тюрам (Костич, 72), Маккенни, Камбиясо, Консейсау (Жегрова, 72), Кенан Йилдиз (Давид, 87), Влаҳович (Миретти, 83)
«Спортинг»: Руй Силва, Гонсалу Инасиу, Диоманде, Араухо, Ваяннидис (Куарежма, 67), Юлманн, Симоес (Сантос, 82), Тринкан, Гонсалвеш (Морита, 82), Кенда (Катаму, 67), Иоаннидис (Суарес, 72)
Огоҳлантиришлар: Тюрам, 24. Камбиясо, 27 – Гонсалвеш, 33. Араухо, 61. Юлманн, 73

Ўйин стартида «Ювентус» Максимилиано Арауходан тезкор гол ўтказиб юборди, бир неча дақиқа ўтиб туринликларни дарвоза устуни иккинчи голдан қутқариб қолди. Лучано Спаллетти шогирдлари фақат шундан кейин уйғонишди: мезбонлар рақиб дарвозаси томон 18 бор зарба беришди, португаллар дарвозабони Руй Силва 7 бор сейв ижро этиб, тур қаҳрамонларидан бирига айланди. У фақат Влаҳовичнинг зарбасини ўтказиб юборди, шу билан бирга жамоаси учун дуранг ҳисобни сақлаб қолди. Бу дурангдан кейин лиссабонликлар ўнинчи ўринни сақлаб қолди, «Кекса Синиора»да эса ҳали ҳам ғалаба йўқ (=3-1) ва учта дурангдан кейин жамоа ҳозирча 23-ўринда. Аммо бундай старт жамоа учун янгилик эмас — «Юве» 1998 ва 2013 йилларда ҳам ЕЧЛни қаторасига тўрт ғалабасиз серия билан бошлаганди.

«Атлетико» – «Юнион» 3:1
Голлар: Алварес, 39 (1:0). Галлаҳер, 72 (2:0). Сайкс, 80 (2:1). Лиоренте, 90+6 (3:1)
«Атлетико»: Облак, Ганцко, Ле Норман (Хименес, 26), Руджери, Молина, Коке (Галлаҳер, 62), Барриос, Баэна (Алмада, 62), Симеоне (Лиоренте, 88), Гризманн (Серлот, 62), Алварес
«Юнион»: Схерпен, Макаллистер, Берджесс, Сайкс, Халаили (Патрис, 85), ван де Перре (Расмуссен, 74), Схофс (Дэвид, 60), Зорган, Аит Эл-Ҳожи (Жигер, 74), Нянг, Родригес (Буфал, 74)
Огоҳлантиришлар: Молина, 68 – ван де Перре, 45. Ньянг, 66. Макаллистер, 81

0:4 ҳисобларидаги икки мағлубиятдан кейин «Юнион» Мадридда нисбатан муносиб ўйин намойиш этди, аммо барибир ютқазди. Биринчи бўлим охирларида Жулиано Симеоне белгияликлар мудофаасини ёриб ўтиб, бир ҳаракат билан ҳимоячини йўлдан олди ва Алваресни зарба бериш нуқтасига чиқарди. Бу Хулианнинг ЕЧЛда «Атлетико» сафида 13 ўйиндаги тўққизинчи голи бўлди ва у аллақачон «Манчестер Сити» сафидаги кўрсаткичини (17 ўйинда 8 гол) яхшилади. Иккинчи бўлимда Галлаҳер ҳисобдаги фарқни оширди, меҳмонлар кўп ўтмай ҳисобни қисқартирганди, аммо қўшимча дақиқаларда Лиоренте интригани ўлдирди. Турнирдаги иккинчи ғалабадан кейин «матрасчилар» топ-8 учун курашга қайтди.

«Олимпиакос» – «ПСВ» 1:1
Голлар: Мартинш, 17 (1:0). Пепи, 90+5 (1:1)
«Олимпиакос»: Тзолакис, Пирола, Рецос, Ортега, Родиней, Дани Гарсия (Диогу Насименту, 63), Музакитис, Шикинью (Тареми, 73), Поденсе (Коштинья, 83), Мартинш, Эл-Кааби (Скипиони, 83)
«ПСВ»: Коварж, Гасеровски, Схаутен, Салах-Эддин (Ваннер, 67), Дест, Мауро Жуниор, Верман, Сайбари (Боаду, 84), Перишич (Байрактаревич, 68), Ман (Пепи, 58), Тил (Дриош, 58)
Огоҳлантиришлар: Скипиони, 89 – Перишич, 63

«Олимпиакос» барча параметрлар бўйича нидерландлардан устун келди, меҳмонлар 78-дақиқага қадар дарвоза соҳасига тўғри борган бирорта зарба бера олмаганди. Аммо ўйинга қўшиб берилган дақиқалар якунланаётганида Пепи жарима зарбасидан оширилган тўпни дарвозага йўллади ва жамоасини мағлубиятдан қутқариб қолди. Америкалик ушбу ҳужумчи ЕЧЛда учинчи бор қўшимча дақиқаларда гол урди ва турнирнинг бу борадаги рекордчилари Криштиану Роналду ва Серхио Агуэро билан тенглашиб олди. «ПСВ» очколари сонини 5 тага етказиб, ҳозирча умумий жадвалда 17-ўринда бормоқда, «Олимпиакос» ўтиш ўйинларига йўлланма берадиган топ-24 учун курашиши мумкин, аммо ҳозирча 2 очко билан 31-ўринда жойлашган.

«Буде-Глимт» – «Монако» 0:1
Гол: Балогун, 43 (0:1)
«Буде-Глимт»: Хайкин, Бертуфт, Моэ (Гундерсен, 46), Беркан (Нилсен, 86), Севолд, Берг, Фет (Бломберг, 73), Эвен, Хауге (Мяяття, 86), Эукленн, Хег (Хелмерсен, 73)
«Монако»: Кен, Салису, Кайю Энрике, Керер, Головин, Кулибали, Уттара, Тезе, Аклиуш (Биерет, 72), Минамино (Кабраль, 63), Балогун
Огоҳлантиришлар: Эукленн, 4 – Керер, 24. Салису, 42. Уттара, 88
Четлатиш: Гундерсен, 81

Ўтган турларда «Манчестер Сити» (2:2) ва «Тоттенҳэм»дан (0:0) очко олишга эришган «Монако» бу сафар турнирдаги илк ғалабасига эришди. Норвегиядаги ўйинда Балогуннинг биринчи бўлим охиридаги ягона голи барчасини ҳал қилди. Монегаскликлар бунгача ЕЧЛда қаторасига олти ўйиндан буён ғалаба қозона олмаётганди, қолаверса, жамоа ўн бир йилдан буён илк бор ЕЧЛда қаторасига икки ўйинда дарвозаси дахлсизлигини сақлаб қолди.

Умумий турнир жадвали