Камбоджа ва Таиланд ўртасида ҳарбий ҳаракатлар давом этмоқда. Трампнинг чақириғи фойда бермади

Камбоджа ва Таиланд бир-бирини бир кун аввал АҚШ президенти Доналд Трамп ҳар икки томонни тинчликка чақирганидан сўнг ҳам чегара ҳудудларида артиллерия ҳужумларини давом эттиришда айблади.

Камбоджа бир кун аввал Доналд Трампнинг «зудлик билан ва сўзсиз ўт очишни тўхтатиш» таклифига рози эканини «аниқ кўрсатди», деб ёзди мамлакат бош вазири Хун Манет.

Таиландда Трампдан миннатдор эканликларини, аммо аралашувни истамасликларини айтишди. «Бизнинг шартимиз шундан иборатки, биз учинчи давлатнинг иштирокини истамаймиз, бироқ унинг [Трампнинг] эътибори учун миннатдормиз», деган журналистларга Таиланд бош вазири вазифасини бажарувчи Пхумтхам Вечайчай.

Тинчликка чақириқларга қарамай, 27 июл куни эрталаб икки давлат чегарасида тўқнашувлар давом этди. Камбоджа мудофаа вазирлиги Таиланд ҳарбийлари чегара бўйлаб ўққа тутиш ва қуруқликдаги операцияларни бошлаганини маълум қилди. Таиланд армиясининг хабар беришича, Камбоджа кучлари Сурин провинциясини, жумладан, турар жой бинолари ҳудудини оғир артиллериядан ўққа тутган. Шунингдек, Камбоджа баҳсли ҳудуддаги Та Муэн Том ибодатхонасига ракета зарбалари берди, дея маълум қилди Таиланд ҳарбийлари. Таиланднинг Камбоджа билан чегарадош Сисакет провинциясида Reuters журналистлари отишма овозларини эшитган, бироқ чегаранинг қайси томонида эканини аниқлай олмаган.

Таиланд Ташқи ишлар вазирлиги «Камбоджа яхши ниятнинг бутунлай йўқлигини намойиш этар экан, инсон ҳуқуқлари ва гуманитар ҳуқуқнинг асосий тамойилларини бузаётган экан, ҳарбий ҳаракатларни тўхтатишга эришиб бўлмаслиги»ни таъкидлади. Камбоджа мудофаа вазирлиги, ўз навбатида, можаронинг авж олиши ва тинчлик саъй-ҳаракатларига путур етказишда Таиланд қўшинларини айблади.

26 июл куни Доналд Трамп Камбоджа бош вазири ва Таиланд бош вазири вазифасини бажарувчи билан телефон орқали мулоқот қилгани ва «ҳар икки томон зудлик билан ўт очишни тўхтатиш ва тинчликка эришишга интилаётгани»ни маълум қилганди. Унинг қўшимча қилишича, иккала давлат ҳам АҚШ билан савдо бўйича «музокаралар столига қайтишга интилмоқда», бу эса ҳарбий ҳаракатлар давом этаётган бир пайтда имконсиз.

Таиланд ва Камбоджа чегарасида артиллерия ва авиация иштирокидаги тўқнашувлар 24 июл куни – расмий Бангкокнинг таъкидлашича, камбоджаликлар томонидан қўйилган миналар портлаши оқибатида икки нафар таиландлик аскар ҳалок бўлганидан бир неча кун ўтиб бошланди. Ҳарбий ҳаракатлар оқибатида камида 30 киши, жумладан, Таиландда 13 нафар, Камбоджада саккиз нафар тинч аҳоли ҳалок бўлди. Чегара ҳудудларидан 200 мингдан ортиқ киши эвакуация қилинди.