Таиланд ва Камбоджа жанговар ҳаракатларни давом эттирмоқда

Таиланд ва Камбоджа ўртасида бир ҳафта олдин бошланган жанговар ҳаракатлар якшанба куни, 14 декабрда ҳам давом этди. Таиланд Мудофаа вазирлиги матбуот котибининг айтишича, Камбоджа қиролликнинг бир қатор чегарадош вилоятларини ўққа тутган ва бомбардимон қилган. Ўз навбатида, Камбоджа Мудофаа вазирлигида билдирилишича, ярим тундан кейин Таиланд ушбу давлат ҳудудини миномёт снарядлари ва бомбалар билан ўққа тутган.

Шу билан бирга, Камбоджа билан чегарадош Таиланднинг қатор вилоятларида соат 19:00 дан 05:00 гача комендантлик соати жорий этилди. Бир кун олдин Камбоджа Таиланд билан чегарадан ўтиш пунктларини ёпган.

АҚШ президенти Доналд Трамп 12 декабр куни Таиланд ва Камбоджа бош вазирлари — Анутхин Чанвиракун ва Хун Манет билан телефон орқали музокара ўтказган. Шундан сўнг у ҳар икки мамлакат ўша куннинг ўзи — 12 декабрдан бошлаб барча жанг ҳаракатларини тўхтатишга келишиб олганини айтган.

Бироқ суҳбат якунлари бўйича баёнотларида на Анутхин, на Хун бундай келишув ҳақида тилга олган. Таиланд бош вазири эса оташкесим бўйича келишув мавжудлигини очиқ рад этган. «Таиланд мамлакатимиз ва аҳолимиз учун таҳдид ва хавф йўқолганини ҳис қилмагунча, ҳарбий ҳаракатларни давом эттиради», — деб ёзган у Facebook’да.

Камбоджа ҳукумати раҳбари ўзининг Facebook’даги постида Трамп билан суҳбатни эслаган, аммо мамлакати октябрда Куала-Лумпурда имзоланган келишув асосида тинч ечим излашда ҳали ҳам давом этаётганини билдирган.

Чегара бўйича баҳс билан боғлиқ, ўнлаб йиллардан бери давом этиб келаётган Камбоджа ва Таиланд ўртасидаги қарама-қаршиликнинг навбатдаги кучайиши душанба куни, 8 декабрда бошланди. Томонлар чегаранинг турли участкаларида ракета ва артиллериядан фойдаланган ҳолда жанг ҳаракатларини қайта тиклади. Расмий маълумотларга кўра, 14 декабр ҳолатига келиб ҳар икки томондан камида 25 киши ҳалок бўлган, жумладан 14 нафар таиландлик ҳарбий ва 11 нафар камбоджалик тинч аҳоли вакили.

Июл ойидаги аввалги кескинлашувдан кейин — ўшанда беш кунлик жангларда 40 нафардан ортиқ киши ҳалок бўлган ва тахминан 300 000 нафар тинч аҳоли ўз уйини тарк этишга мажбур бўлган — АҚШ воситачилигида оташкесимга эришилган эди. Октябр охирида Камбоджа ва Таиланд бош вазирлари декларация имзолаб, унда «кескинликни пасайтириш, ишончни тиклаш ва ўзаро манфаатли муносабатларга кўмаклашиш» мажбуриятини олган.

Бироқ ноябр ойида Таиланд бу келишувни бажаришдан чекинган: Бангкок маълумотига кўра, чегарадош ҳудудда мина портлаши натижасида икки нафар таиландлик аскар ҳалок бўлган. Шу тариқа Таиланд Камбоджани оташкесим режими бузилганида айблаган.