Қишки трансферларнинг сўнгги кунидаги 10 интрига

Бугун қишки трансферлар ойнасининг сўнгги куни. Европа клубларида ўзига керакли футболчиларни топиш ва таркибни кучайтириш учун саноқли соатлар қолмоқда. Кучли бешлик чемпионатларида 2 февралга ўтар кечаси янги трансферларни рўйхатга олиш тўхтатилади.

Қуйида шу қишдаёқ жамоасини ўзгартириши мумкин бўлган футболчилар ўнлиги келтирилади.

Матета бир оёғи билан «Милан»да

«Милан» январ ойи бошида ҳужумчи олиб бўлганди – «Вест Ҳэм»дан Никлас Фюллкруг ижарага олинган. Аммо скудетто учун курашаётган футболчи бу билан чекланмоқчи эмас.

 Энди клуб «Кристал Пэлас» сафида АПЛда сўнгги икки ярим мавсумда 38 гол уришга эришган француз ҳужумчисини таркибига қўшиб олиш арафасида. Таниқли инсайдер Фабрицио Романо ва Италиядаги La Gazzetta dello Sport нашри ушбу трансфер ҳал бўлганини ёзишган. Матета тиббий кўрикдан ўтиш арафасида. «Россонерилар» футболчи учун 30 миллион евро тўлайди ва қўшимча бонуслар ваъда қилади.

Бу қишда Жан-Филипп учун жиддий рақобат кечди. Аввалига барча у «Ювентус»га ўтиши ҳақида ёзаётганди, аммо томонлар пул бўйича ҳам, трансфер шартлари борасида ҳам келиша олишмади – инглизлар январ ўрталарида асосий ҳужумчиси учун 40 миллион евро сўраётганди. Кейин футболчи учун курашга «Ноттингҳэм Форест» қўшилди ва 35 миллион евро таклиф этди – ба таклиф ҳам рад этилди. Бунда «Пэлас» ўз етакчисини АПЛдаги рақобатчисига сотишни истамагани ҳам рол ўйнади. 28 ёшли форвардга «Тоттенҳэм» ҳам қизиққанди, аммо Рандал Коло Муани «Юве»га қайтмайдиган бўлгач, музокаралар тўхтаган. Якунда футболчининг ўзи клуб раҳбариятига кетиш истагини билдиргач, италян клуби таклифи қабул қилинган.

Бу вақтда «Милан» Матетага жой бўшатиш учун ўтган қишда «Челси»дан сотиб олинган Кристофер Нкункуни сотувга қўйган – унга «Фенербаҳче» ва «Рома» клубларидан таклифлар бор.

«Пэлас» янги форвард керак

Лондонликлар энди Матета ўрнига 50 миллион евро сарфлаб, «Вулверҳэмптон» ҳужумчиси Йорген Ларсенни олиб келмоқчи. «Бўрилар» биринчи даврани жуда ёмон ўтказди, норвегиялик ҳужумчи эса биргина гол (пеналтидан) ва бир ассист билан чекланди. Шу билан бирга, у ички кубок ўйинларида яхши кўрсаткичга эга –  тўрт ўйинда 5+1.

Катта эҳтимол билан, «Пэлас» унинг ўтган мавсумдаги кўрсаткичларини ҳам инобатга олган, футболчи АПЛдаги дебют мавсумида «гол+пас» бўйича 18 очко жамғарганди, у айниқса финишда кучли ўйнаганди: охирги 10 турда етти гол уриб, икки бор шерикларини голли пас билан таъминлаганди.

Аммо барибир унга тўланаётган йирик суммани изоҳлаш қийин. Қолаверса, Йорген Матетадан у қадар ёш эмас – у февралда 26 ёшга чиқади, француз эса ёзда 29 ёшда бўлади. Афтидан, «Кристал Пэлас» ҳозирча Эберечи Эзе ва Марк Гейининг трансферларидан тушган маблағни тўғри тасарруф этолмаяпти.

«Ювентус»га форвард керак

Матета трансфери барбод бўлганидан кейин ҳам «Ювентус» ҳужумчи қидиришдан тўхтамади. Лекин жамоа ҳозиргача бу масалани ҳал қила олмади. «Кекса синиоралар» «Фенербаҳче» билан Юссуф Ан-Носирийни ижарага олиш бўйича оғзаки келишувга эришганди, аммо сўнгги паллада марокашлик ҳужумчининг ўзи бунга қарши чиқди. У ижара асосида ўйнашни истамади. Бундан ташқари, Ан-Носирий маоши миқдори камайишига рози бўлмаган.

Шундан кейин «Юве» эътиборини бошқа форвардларга қаратганди. Январ ойи охирига келиб «Манчестер Юнайтед»дан Жошуа Зиркзее ва «Ливерпул»дан Федерико Киеза вариантлари муҳокама қилинди, шунингдек, «Тоттенҳэм»да ижара асосида ўйнаётган Рандал Коло Муанини Туринга қайтариш масаласи кўриб чиқилган. Аммо якшанба куни инсайдер Ди Марцио «Ювентус» ҳозирда «Галатасарой»да ўйнаётган Мауро Икарди бўйича музокара олиб бораётганини хабар қилди. Аргентиналик ҳужумчи трансферини у билан «Интер»да ҳамкорлик қилган Лучано Спаллетти истамоқда. Манбага кўра, туринликлар клуби Икардига бир ярим йиллик шартнома таклиф қилган.

«Интер»га яримҳимоячи керак

Италия чемпионати пешқадами анчадан буён яримҳимоячи қидирмоқда. Январ ойи бошидан буён Кёртисом Джонсом из «Ливерпул» футболчиси Кёртис Жонс ва «Ал-Иттиҳод»да ўйнаётган Мусса Диаби номлари «Интер» билан боғлаб келинди. Аммо ушбу икки клуб ҳам ўз футболчиларини қўйиб юборишни истамади. «Интер» 36 ёшли Иван Перишични қайтариш масаласида ҳам ПСВ билан келиша олмади.

Трансферлар ойнаси охирига келиб жамоа яна Жонс вариантига қайтган. Айрим манбаларга кўра, мерсисайдликлар устози Арне Слот ва футболчи ўртасида жиддий зиддият келиб чиққан ва бу футболчининг кетиши билан якунланиши мумкин. Унга «Интер»дан ташқари «Тоттенҳэм»дан ҳам қизиқиш мавжуд.

Аммо италянлар клубида имконият юқори дейиш мумкин. Чунки мерсисайдликлар «Интер» ҳимоячиси Дензел Думфрисни ўз сафида кўришни истамоқда.

«Ливерпул»га ҳимоячи керак-1

«Ливерпул» Фримпонгнинг мунтазам жароҳат олишидан чарчади ва ҳимоя чизиғини мустаҳкамлашга ҳаракат қилмоқда. Дензел Дюмфрис ҳақидаги хабар А Серияга ихтисослашган инсайдер Жанлука Ди Марцио ва Sky Sport Italia нашри томонидан тарқатилди. FCInter1908 нашри журналисти Даниэле Мари ҳам бу маълумотни тасдиқлади: «Ливерпул» Дюмфрисни шу қишдаёқ олмоқчи. Аммо муҳим нюанс бор.

Нидерландиялик футболчи ноябрдан буён ўйнамаяпти – у тўпиқ қисмидан жиддий жароҳат олган ва жарроҳлик амалиётини бошдан кечирган. У мартгача майдонга қайтиши кутилмаяпти, бу эса ушбу трансферни камида ёзгача кечиктириши мумкин. Агар мерсисайдликлар у тезроқ соғайишига кафолат олишса, трансфер амалга ошиши мумкин.

«Интер» шартномаси якунига ярим йил қолган футболчи учун 25 миллион евро тўлайди. Дензелни ёзда текинга қўлга киритиш ҳам мумкин. Аммо ёзда унга рақобат жиддий бўлади. Хусусан, «Манчестер Сити» устози Пеп Гвардиола ҳам уни ўз жамоасида кўришни истамоқда. Шунингдек, «Барселона» ҳам анчадан буён унинг атрофидаги вазиятни кузатиб келмоқда.

«Ливерпул»га ҳимоячи керак-2

Лутсҳарел Гертрейда ҳозирда «Сандерленд»да ижара асосида ўйнамоқда: у ўтган 23 турдан 20 тасида қатнашди, 10 марта бошланғич таркибдан ўрин олди. Ливерпулликлар уни биринчи навбатда жароҳатга мойил Фримпонгга ўринбосар сифатида кўрмоқда. Аммо Гертрейда марказий ҳимоячи ёки таянч яримҳимоячиси позицияларида ҳам ўйнай олади.

Жамоа ушбу футболчини қўлга киритиш учун «Сандерленд» билан ҳам, унинг асл клуби «Лейпциг» билан ҳам келишиши керак. У Арне Слотнинг номзоди экани аниқ – Гертрейда «Фейенорд»да уч мавсум давомида ушбу мутахассис қўл остида тўп сурган.

Бундан ташқари, агар Эндрю Робертсон «Тоттенҳэм»га кетадиган бўлса, қизиллар Костас Цимикасни «Рома»дан ижарадан қайтариши мумкин.

«Ливерпул»га ҳимоячи керак-3

Қишки трансферлар ойнасида Европа топ-клублари учун энг жозибали фигура – «Ренн» марказий ҳимоячиси Жереми Жаке бўлди. Франция миллий жамоасининг 20 ёшли аъзоси тез орада АПЛда ўйнай бошлайди.

Январ ойи бошида ОАВ ва турли инсайдерлар Жакега «Челси» ва «Манчестер Юнайтед» томонидан қизиқиш ҳақида ёзишганди. Ой ўрталарига келиб RMC Sport лондонликлар клуби «Ренн»га 50 млн евро тўламоқчилиги, аммо французларни бу таклиф қониқтирмаётганини хабар қилди. Жамоа ёш истеъдод трансферидан камида 60 млн евро ишлаб олишни кўзлаганди. Сотувчи ва харидор ўртасидаги музокараларга параллел равишда «Челси» Жереми билан шахсий шартнома борасида ҳам келишиб қўйганди. Аммо трансфер барбод бўлди.

Трансферлар ойнаси охирига келиб Фабрицио Романо Жаке «Ливерпул»га ўтиши, инглизлар трансфер учун 60+10 млн евро тўлашини хабар қилди, аммо футболчи мерсисайдликлар аъзоси бўлганини айтишга ҳали эрта – Романо каби инсайдерлар ҳам вақти-вақти билан хатога йўл қўйиб туради.

«Атлетико»га ҳужумчи керак

Адемола «Аталанта»даги энг ёмон мавсумини ўтказмоқда. Барчаси ёзда, нигериялик ҳужумчи ўзини сотишни талаб қилиб, машғулотларда қатнашишдан бош тортганидан бошланганди. У куз давомида бош мураббий Иван Юрич билан бир неча бор жанжаллашди ва февралга келиб атиги икки гол урди.

Фабрицио Романо хабарига кўра, Лукманга «Фенербаҳче» томонидан жиддий қизиқиш бўлган. Турклар бир неча ҳафта давомида футболчини кўндиришга ҳаракат қилишган ва якунда клуб билан ҳам 40 миллион еврога трансфер қилиш борасида келишишган. Аммо келишув амалга ошмади – томонлар тўловни амалга ошириш шарти бўйича келиша олмаган, италянлар маблағнинг бир қисмини олдиндан ўтказиб беришни талаб қилишган.

Якунда «Атлетико» варианти пайдо бўлган. Италия клуби 35+5 миллион евролик таклифга рози бўлган. Аммо энди «Аталанта» мадридликларга тўлов бўйича ҳеч қандай шарт қўймаган. Испанияда Лукманнинг маоши миқдори Туркиядагилар таклиф қилганидан икки баробар камроқ бўлади.

Бундан ташқари, «Атлетико» 2024 йил ёзида «Бенфика»дан «Ал-Ҳилол»га ўтган Леонардони ҳам Европага қайтармоқчи. Фабрицио Романо маълумотига кўра, «матрасчилар» футболчи билан келишувга эришган, Саудия клубига эса ижара бўйича таклиф юборилган.

Бензема Саудиядан кетмоқчи

Француз ҳужумчиси ва «Ал-Иттиҳод» ўртасида можаро юзага келган: футболчи навбатдаги тур ўйинида майдонга тушишдан ва янги шартнома имзолашдан бош тортган. Карим арабларнинг янги шартнома бўйича таклифини ўзига нисбатан ҳурматсизлик сифатида қабул қилган – шартномада Бенземанинг маоши унинг имиж ҳуқуқидан келадиган даромадга боғлаб қўйилган. Агар томонлар ярашиб олмаса, ҳужумчи ёки ёзгача, шартномаси муддати тугагунга қадар бойкотни давом эттиради, ёки ҳозир бошқа клубга ўтади.

Италиядаги Tuttosport нашри «Ювентус» Карим билан шартнома имзолашни ўйлаётгани ҳақида ёзган. Аммо бунинг учун «Олтин тўп» соҳиби маоши қисқаришига рози бўлиши керак бўлади. Туркиялик инсайдер Акром Конур эса «Бешиктош» варианти ҳақида ёзган. Турклар жамоаси трансферни тезлаштириш учун 3 миллион евро тўлов қилишга ҳам тайёр. Шунингдек, МЛС клублари ва «Лион» вариантлари ҳам бор.

Канте Саудиядан кетмоқчи

Н’Голо Канте ҳам «Ал-Иттиҳод»да ўтган икки ярим йилдан кейин Европага қайтиши мумкин. 34 ёшли француз учун асосий даъвогар сифатида «Фенербаҳче» номи тилга олинмоқда. Инсайдер Флориан Плеттенберг ушбу таянч яримҳимоячиси истанбулликлар клуби таклифини қабул қилгани ва Туркия чемпионатига ўтиш учун маоши камайишига ҳам рози бўлганини хабар қилган. Sports Digitale хабарига кўра, «Фенербаҳче» ёзда эркин агентга айланиши мумкин бўлган Кантени ҳозирнинг ўзида сафга қўшиб олиш учун 4 млн евро таклиф қилмоқда ва «Ал-Иттиҳод»нинг жавобини кутмоқда. Саудияликлар эса мавсум ярмида юлдуз футболчиси билан хайрлашишга шошилмаяпти.

Шу билан бирга, «Фенербаҳче» футболчи учун ягона вариант эмас. Қишки трансферлар ойнаси очилишидан олдинроқ L’Équipe Кантеда Англия ва Франциядан вариантлар борлигини хабар қилганди. Январ ойи охирида инсайдер Романо АПЛ клубларидан бири Н’Голо учун истанбулликлар билан рақобат қилиши мумкинлигини хабар қилди. У айнан қайси клуб ҳақида гап кетаётганига аниқлик киритмаган. Французнинг Англия чемпионатига қайтиши масаласи унинг агенти билан муҳокама қилингани қайд этилган.