Мбаппе гол урди ва жароҳат олди, аммо «Реал» бир амаллади. ЕЧЛда кун ўйинлари

Класс эвазига ғалаба

«Жирона» — «Ливерпул» 0:1
Гол: Салоҳ (63, пеналти). 
«Жирона» – Гассанига, Блинд (Солис, 77), Крейчи, Ҳуанпе, Франсес, Ромеу, ван де Бек (Мартин, 76), Гутиеррес, Асприля, Ҳил (Порту, 71), Данжума (Стуани, 72).
«Ливерпул» – Алиссон, Робертсон, ван Дейк, Гомес, Александер-Арнолд, Жонс (Эллиот, 76), Гравенберҳ, Собослаи, Диас (Эндо, 89), Нунес (Гакпо, 71), Салоҳ.
Огоҳлантиришлар: Диас (53), Ромеу (55), Гомес (79), Франсес (87), Порту (90+3).

«Ливерпул» Каталонияда ўзини ортиқча қийнамади. Жамоа куч тежаган ҳолда натижага эришишни кўзлаганди. Аммо «Жирона» турнир жадвалининг қуйи қисмларида келаётган бўлса-да, ўз уйида жиддий рақобат кўрсатадиган жамоа. Мезбонлар илк хавфли ҳужумида очиқчасига меҳмонларни кечиришди, Блинд дарвозабон ҳудудида туриб тўпни хато тепди, Данжуманинг кучсиз зарбаси эса газонга йиқилиб бўлган Алиссоннинг ўзига борди. Ҳил ҳам ҳужумни якунлашда сусткашлик қилди, фақат Асприлянинг кучли зарбасидан кейин меҳмонлар дарвозабони чинакамига қаҳрамонлик кўрсатишига тўғри келди.

Умуман олганда, Арне Слот жамоаси дастлабки 45 дақиқаликда ўз вазиятларидан фойдалана олмаслик жазоланиши мумкинлигини тушуниб етди. Иккинчи бўлимда ҳал қилувчи вазият VAR аралашуви билан содир бўлди: ван де Бек жарима майдони ичида Диаснинг оёғини босиб олди, белгиланган пеналтини аниқ ижро этган Салоҳ савия эвазига ғалаба қозониш қандай бўлишини намойиш этди. Мерсисайдликлар олти учрашувда олти ғалабага эришиб, турнир жадвалида 18 очко билан яккапешқадамлик қилмоқда ва амалда плей-офф масаласини ҳал қилди, аммо Слот ўйиндан кейинги матбуот анжуманида шогирдларининг ҳаракатларидан норози бўлди ва бу турнирдаги энг ёмон ўйини бўлганини қайд этди.

Суперкубок ремейки

«Аталанта» — «Реал» 2:3
Голлар: де Кетеларе (45+2, пеналти), Лукман (65) — Мбаппе (10), Винисиус (56), Беллингҳэм (59). 
«Аталанта» – Карнезекки, Колашинац, Ҳин, Жимсити (Коссуну, 74), Пашалич (Самаржич, 58), Белланова (Заппакоста, 75), Ружери (Дзаниоло, 87), Эдерсон, де Рон, Лукман, де Кетеларе (Ретеги, 74).
«Реал» – Куртуа, Фран Гарсия, Рюдигер, Чуамени, Васкес, Валверде, Себаллос (Модрич, 84), Винисиус, Беллингҳэм (Гулер, 87), Диас (Асенсио, 84), Мбаппе (Родриго, 36).
Огоҳлантиришлар: Чуамени (45+2), Коссуну (90+2), Васкес (90+3). 

«Аталанта» кўтарилиш даврида ва ўтган ҳафтани А серияда якка пешқадам сифатида якунлаганди. «Реал» эса жароҳатлардан азият чекмоқда ва ўз тарихида илк бор турнир гуруҳ босқичидаги беш турдан учтасида ютқазди. Бундай ҳолатда ўйинда ким фаворитлигини аниқ айтиб бўлмайди, аммо шу куни мадридликлар сафида Винисиус Жуниор сафга қайтганди. Мбаппе ҳам аста-секинлик билан формага қайтмоқда. Бергамода француз ҳужумчиси илк дақиқалардан майдондаги энг фаол футболчи бўлди ва 10-дақиқада жарима майдони олдида тўпни қабул қилиб, бир ҳаракат билан Де Ронни йўлдан олди ва 26 ёшга тўлишига ўн кун қолганида асосий еврокубокдаги 50-голини нишонлади. Бундай натижага ундан ёшроқлигида фақат Месси эришган (24 ёшу 284 кунлик).

Аммо Килиан 36-дақиқадаёқ жароҳат олди ва Родригога алмаштирилди. Қолаверса, биринчи бўлимга қўшиб берилган дақиқаларда ҳимоя марказида тушган Тшуамени Колашинацни йиқитди ваа Де Кетеларе пеналтидан ҳисобни тенглаштирди. Иккинчи бўлимда эса Винисиус етакчилик сифатларини намойиш этди. У ўзи гол урганида омад ҳам кулиб боқди, тўп унга Бразилия миллий жамоасидаги шериги Эдерсондан келди. Винининг меҳмонларнинг ҳисобдаги устунлигини мустаҳкамлаган Беллингҳемга паси эса Кроосга хос услубда анча ичкаридан етказиб берилди ва ўйиннинг безагига айланди.

Ҳисобдаги фарқни қисқартирган Лукманнинг ўйини ҳам мақтовга сазовор, у Лукас Васкес ортидан туриб яқин бурчакни аниқ нишонга олди. Ўйиннинг энг яхши футболчиси мақомини Винисиусдан тортиб олган нигериялик футболчи жамоасини мағлубиятдан қутқариб қолиши ҳам мумкин эди, аммо ўйинга қўшиб берилган дақиқаларда унинг узатмасидан кейин бергамоликларнинг энг яхши ҳужумчиси Ретеги дарвозабон ҳудудида туриб хато зарба йўллади. Жан Пиеро Гасперини шогирдлари турнирда илк бор ютқазди, «Реал» эса — Карло Анчелотти ваъда қилганидек — вазиятни ўнгламоқда. Лекин олти турдан кейинги тўққиз очко ҳали Мадрид учун ўта камтарона кўрсаткич. Кейинги турларни «Реал» «Залсбург» ва «Брест»га қарши ўтказади.

Леверкузеннинг янги қаҳрамони

«Байер» — «Интер» 1:0
Гол: Мукиеле (90). 
«Байер» – Коварж, Инкапиэ, Тапсоба, Та, Мукиеле, Жака, Паласиос, Грималдо (Гарсия, 90+3), Фримпонг, Виртц (Андрих, 90+3), Телла (Терре, 83).
«Интер» – Зоммер, Бастони, де Врей, Биссек, Карлос Аугусто (Димарко, 56), Дармиан, Зелински, Чалхонўғли (Аслани, 66), Фраттези (Барелла, 66), Торимий (Арнаутович, 85), Тюрам (Мартинес, 66).
Огоҳлантиришлар: Чалхонўғли (25), Аугусто (27).

Бу — ҳужумга зўр берадиган «Байер» ҳамда биринчи навбатда ҳимояни мустаҳкамлайдиган «Интер» қарама-қаршилиги эди, меҳмонлар дарвозабони Зоммер олдинги беш турда бирорта гол ўтказмаганди. Лекин мезбонлар сафида Бонифасе ва Шик йўқлигида ҳам нерадзурриларнинг қуруқ серияси учинчи дақиқадаёқ барҳам топишига бир бахя қолди. Фримпонгнинг зарбасидан кейин миланликларни дарвоза тўсини қутқарди. Кейин эса — Вирц айланма зарба берганида — Зоммер қутқарди. Нариги томондаги дарвозада турган Коварж эса дастлабки 45 дақиқа давомида зерикиб қолди — еврокубок ўйинини яна Лаутаро Мартинессиз бошлаган «Интер» рақиб дарвозаси соҳасига тўғри борган бирорта зарба йўлламади. Бу борада вазият иккинчи бўлимда ҳам ўзгармай қолди, италияликлар девори эса 90-дақиқада барибир бузиб ўтилди. Ҳаби Алонсо жамоаси чемпионлик мавсумида бўлгани каби ўйин охирида ғалабани илиб кетди. Бу сафар — рақиб жарима майдони ичидаги талатўпда Мукиеле бошқалардан илдамроқ ҳаракат қилиб, янги қаҳрамонга айланди. Бу унинг ёзда «ПСЖ»дан трансфер қилинганидан буён немислар жамоаси сафида урган илк голи.

«ПСЖ» қайтмоқда

«Залцбург» — «ПСЖ» 0:3
Голлар: Рамуш (30), Мендеш (72), Дуэ (85). 
«Залцбург» – Шлагер, Гиндо, Байду, Дедич, Капалдо, Гурна-Дуат (Байчетич, 66), Бидструп (Кавамура, 81), Доржелес, Глух (Терзич, 81), Йео (Кларк, 57), Ратков (Дагим, 57).
«ПСЖ» – Доннарумма, Мендеш (Эрнандес, 83), Пачо, Маркинос, Ҳакими, Невеш, Витиня, Руис (Заир-Эмери, 73), Ли Кан Ин, Барколя, Рамуш (Дуэ, 66).
Огоҳлантиришлар: Гиндо (35), Гурна-Дуат (53), Капалдо (75).

Ўйиндан олдин плей-офф ҳудудидан ташқарида бўлган «ПСЖ» бор аламини залцбургликлардан олди, парижликлар сафида ўйиннинг илк қисмида Гонсалу Рамуш фаоллиги билан ажралиб турди. Португалиялик ҳужумчи августда олган жароҳатидан яқинда тузалганди, аммо Луис Энрике форвардга ишонч билдирмоқда ва уни сўнгги ўйинларда бошланғич таркибга киритмоқда. Рамушга гол ҳисси қайтиши керак эди ва сешанба оқшомида у иккинчи уринишда бунга эришди. Биринчи эпизодда форвард Ҳакими ташлаб берган тўпни икки метр масофадан туриб дарвозага кирита олмади, аммо бу боғлам барибир иш берди. Ўйиннинг энг яхши футболчиси бўлган Барколя тўпни қарама-қарши қанотда очилган Ҳакимига етказиб берди, унинг қанотдан дарвозабон ҳудудига йўллаган узатмасини эса Рамуш йиқилаётиб дарвоза бурчагига йўналтириб юборди. Унинг мавсумдаги дебют голи Франция чемпионлари ЕЧЛнинг бу мавсумида сафар ўйинларида урган илк голи бўлди.

Австриядаги португаллар оқшомини эса иккинчи бўлимда Нуну Мендеш давом эттирди, у ҳужумга фаол қўшилиб, захирадан тушган Дуэнинг узатмасини кучли зарба билан голга айлантирди. Дуэнинг ўзи эса ўзига билдирилган ишончни оқлаб, Ҳакимининг яна бир голли пасидан кейин ўйиндаги якуний натижани ўрнатди. «ПСЖ» 2020 йил октябридан буён илк бор турнир сафар ўйинларида дарвозаси дахлсизлигини сақлаб қолди. Бунгача парижликлар 21 ўйин давомида мунтазам равишда гол ўтказишганди. Жамоанинг вазияти аста-секин яхшиланмоқда, «ПСЖ» 7 очко билан чоршанба кунги ўйинлар якунлангунича 24-ўринга чиқиб олди. Бу плей-оффга йўлланма берадиган сўнгги ўрин, аммо барчаси январда ҳал бўлади — «Манчестер Сити» ва «Штутгарт»га қарши ўйинларда.

«Бавария»нинг жаҳли чиқди

«Шахтёр» — «Бавария» 1:5
Голлар: Кевин (5) — Лаймер (11), Мюллер (45), Олисе (70 пеналти, 90+3), Мусиала (87). 
«Шахтёр» – Ризник, Матвиенко, Грам, Бондар, Конопля, Гомес (Крискив, 46), де Маседо (Эгиналдо, 77), Судаков, Бондаренко (Педрино, 77), Зубков (Невертон, 83), Сикан (Траоре, 46).
«Бавария» – Перец, Геррейру (Боэ, 65), Ким Мин Жэ (Дайер, 88), Упамекано, Лаймер (Азну, 88), Горетцка, Киммиҳ, Мусиала, Олисе, Сане (Тел, 65), Мюллер (Ибраҳимович, 88). 
Огоҳлантиришлар: Сане (7), Крискив (55), Траоре (82), Горетцка (82).

«Бавария» фанатлари «Шахтёр»нинг бошқа ўйинларига қараганда чипта нархлари қимматлашганига қарши Гилзенкирҳендаги ўйинни бойкот қилишга чақирди. Шу туфайли номинал мезбонлар нархни пасайтиришга мажбур бўлишди ва «Фелтинс Арена» трибуналари ниҳоят тўлдирилди. Мухлислар ўйин бошланиши билан мюнхенликлар дарвозасига урилган голга гувоҳ бўлишди, Кевин рақиб мудофаасидаги хатони жазолади. Аммо танаффусга қадар барчаси ўз жойига тушди. Аввалига жарима майдони ичида тўпни эгаллаб олган Лаймер уни тўсин остига йўллади ва бу йирик ҳисобдаги ғалабанинг бошланиши эди.

Биринчи бўлим охирида баварияликлар прессинги Мусиала Мюллерни дарвоза қаршисига чиқариши билан якунланди. Томас ЕЧЛда қаторасига ўн олтинчи мавсумда гол урмоқда ва бу билан Райан Гиггз ҳамда Криштиану Роналдунинг натижасини такрорлади. Рекорд серияга эса Месси ва Бензема эгалик қилади (18 тадан мавсумда). Айтиш мумкинки, сешанба оқшомида Мюллер ҳужум чизиғида жароҳатланган Кейннинг йўқлигини билдирмади. Штатдаги пеналтичи роли эса Ҳарридан вақтинча Олисега ўтди. Мусиала ҳам ўз голисиз майдонни тарк этмади. У биринчи бор дарвозани ишғол этганида ҳужумдаги фол туфайли гол бекор қилинди, аммо ўйин охирида яримҳимоячи дарвозабон ва ҳимоячиларни болаларча алдаб, барибир ўз мақсадига эришди.

Лейпцигдаги триллер ва «Брест» мўъжизаси

«Лейпциг» — «Астон Вилла» 2:3
Голлар: Опенда (27), Баумгартнер (62) — Макгинн (3), Дуран (52), Баркли (85). 
Лейпциг – Гулачи, Ҳенрикс, Орбан, Гертрюйда, Зайвалд, Нуса, Айдара (Кампл, 46), Вермерен (Клостерман, 84), Баумгартнер, Опенда, Шешко (Андре Силва, 76).
«Астон Вилла» – Мартинес, Дин (Матсен, 83), Торрес, Диего Карлос, Конса, Камара, Тилеманс (Баркли, 83), Кэш (Неделкович, 71), Макгинн (Буэндиа, 76), Рожерс, Уоткинс (Дуран, 46).
Огоҳлантиришлар: Дин (45), Карлос (79), Ҳенрикс (81).

Барча беш учрашувда ютқазган «Лейпциг» олтинчи ўйинда учинчи дақиқадаёқ гол ўтказиб юборди, Уоткинс тўпни дарвоза қаршисида турган Макгиннга ташлаб берди. Англиядагилар дарҳол бу «Астон Вилла»нинг еврокубокларда 1983 йилдан буён энг тезкор голи бўлганини қайд этишди. Аммо бўлим ўрталарида Эмилиано Мартинес ва Диего Карлос бир-бирига ишониб қолганида газондан чўпчиган тўпга Опенда эга чиқиб, бўш дарвозани ишғол этиб, ҳисобни тенглаштирди.

Иккинчи бўлимда эса мезбонлар дарвозабони Гулачи ҳам хатога йўл қўйди. Захира қироли Дураннинг узоқ масофадан йўллаган зарбаси кучи, аниқлиги ва траекторияси билан чиройли чиқди, аммо тўп барибир дарвозабон турган марказ томон келганди. Кейин Опенда яна бир бор ўзини кўрсатиб, анча ортдан етказиб берилган тўпга етиб бориб, Баумгартнерни голли пас билан таъминлади, аммо ўйиндаги сўнгги сўзни барибир Унаи Эмери шогирдлари айтишди. Ҳал қилувчи вазиятда Гулачидан омад юз ўгирди, Баркли узоқ масофадан йўллаган зарбадан кейин тўп рикошет орқали дарвоза тўрига бориб тушди. «Вилла» 13 очко билан амалда плей-оффда, «Лейпциг» эса умидсиз аҳволда.

«Брест» — ПСВ 1:0
Гол: Ле Кардинал (43).
«Брест» – Бизот, Айдара, Ндиайе, Шардонне, Ле Кардинал (Перейра Лаже, 56), Фернандеш, Думбия (Салоҳ, 88), Манетти, Камара, Дел Кастийо, Балде (Сима, 69).
ПСВ – Бенитес, Дамс (Верман, 46), Боскали, Фламинго, Карсдорп (Ледесма, 46), Мауро Жуниор, Тиллман (Тил, 84), Сайбари, Ланг, де Йонг (Пепи, 73), Бакайоко (Лосано, 73).
Огоҳлантиришлар: Дамс (41), Ле Кардинал (45+2), Дел Кастийо (58), Тиллман (64), Шардонне (84), Верман (86).

«Брест» тарих ёзишда давом этмоқда. Рақиб сафида Сайбарининг зарбаси устунга тегиши ва дарвозабон Бизотнинг сейвлари ҳам бунда катта рол ўйнади, аммо французларнинг ўзи ҳам ҳақли ғалабага эришди. Фақат Бенитес яқин масофадан йўлланган зарбани тўсиб, интригани охирги дақиқаларгача сақлаб қолди. Якунда 1:0 ҳисоби ўзгармади. «Брест» олти турда тўрт ғалабага эришди, бу эса француз клублари учун 1996 йилдан буён энг яхши натижа ҳисобланади, ўшанда «Осер» гуруҳ босқичини ўта кучли ўтказганди. Эрик Руа эса ватандош мураббийлар орасида XXI асрда асосий еврокубокдагиилк мавсумида бундай натижа қайд этиш борасида Зинедин Зидан билан бир қаторда туради. Аммо нюанс бор. Зизу «Реал»да ишлаган, Руанинг жамоаси эса — кўпчиликка нотаниш «Брест».

«Брюгге» — «Спортинг» 2:1
Голлар: Куарежма (24, автогол), Нилсен (84) — Катаму (3). 
«Брюгге» – Миниоле, де Кейпер, Мехеле, Ордонес, Сейс, Яшари, Нвадике, Ванакен, Цолис (Нилсен, 81), Олсен (Талби, 65), Ютгла (Нилссон, 64).
«Спортинг» – Исраэл, Матеус Рейс, Диоманде, Куарежма (Сен-Жюст, 45), Кенда (Ҳардер, 87), Тринкау, Араухо (Эсжайю, 81), Симойнш, Юлманд, Катаму, Гёкереш.
Огоҳлантиришлар: Олсен (26), Гёкереш (34), Цолис (43), Нвадике (45+4), Катаму (50), Миниоле (52).

«Спортинг» Рубен Аморим кетганидан кейин чўкишда давом этмоқда. «Арсенал»дан учралган 1:5 ҳисобидан кейин «Брюгге»га сафарда мағлуб бўлинди, гарчи лиссабонликлар Катамонинг зарбасидан кейин ҳисобни очган бўлса-да. «Шерлар» етти йилдан буён илк бор кетма-кет икки ўйинда рақиблари иродали ғалабага эришишига йўл қўйишди. Бу орада миллий чемпионатда «Санта Клара» ва «Морейренсе»га ҳам имконият бой берилганди. Белгиядаги фиаскодан кейин плей-офф масаласини янги йилгача ҳал қилиш имконияти йўққа чиқди. Энди барча умид январдаги ўйинлардан, 10 очкога эга «Спортинг» «Лейпциг» ва «Болоня» билан ўйнайди. Асосийси — унгача Аморимсиз қандай ўйнашни ўрганиб олиш керак.

«Динамо» Загреб — «Селтик» 0:0
«Динамо» Загреб – Загорац, Пер-Габриэл, Теофил-Катрин, Берно, Ристовски, Рог, Качавенда, Батурина (Стойкович, 83), Пяца (Хожа, 82), Шпикич (Мбуку, 73), Куленович.
«Селтик» – Шмейҳел, Тэйлор, Трасти, Картер-Викерс, Жонстон (Ралстон, 46), Ҳатате (Маккоуэн, 65), Макгрегор, Паулу Бернарду (Энгелс, 65), Маэда (Форрест, 73), Фуруҳаси (Ида, 72), Кюн.
Огоҳлантиришлар: Тэйлор (6), Рог (35), Куленович (35), Маэда (38), Ралстон (56).

Юмшоқ қилиб айтганда, Загребдаги зерикарли ўйинни фақат натижа нуқтайи назаридан эслаш мумкин. «Селтик» очколари сонини 10 тага етказиб олди ва январдаги биринчи турда Брендан Роджерс жамоаси ўз уйида «Янг Бойз» устидан ғалаба қозониб, плей-офф масаласини ҳал қилиши мумкин. Саккиз очкога эга «Динамо» учун ҳам ҳали барчаси бой берилгани йўқ, аммо янги йилнинг биринчи ойида хорватларда жуда қийин тақвим бор, сўнгги икки турда жамоа аввалига «Арсенал»га сафар қилади, кейин «Милан»ни қабул қилади.

Кун статистикаси

«Астон Вилла» ҳужумчиси Дуран бу мавсумда 6 бор захирадан ўйинга тушиб гол урди. Бу топ-5 лигалардаги энг яхши кўрсаткич.

«Аталанта» форварди Де Кетеларе 7 (3+4) самарали балл тўплади — бу Чемпионлар лигасида бир кампаниядаги клуб рекорди.

Алиссон «Ливерпул» сафида ЕЧЛнинг 21 ўйинида дарвозаси дахлсизлигини сақлаб қолди. Бразилиялик посбон Пепе Рейнага тегишли бўлган клуб рекордини такрорлади.

«ПСЖ» ҳимоячи Ашраф Ҳакими турнирдаги голли узатмалари сонини 24 тага етказди. Бу парижликлар жамоаси ҳимоячилари орасида Максвеллга тегишли бўлиб турган рекорд такрорланишидир.

Умумий жадвал