«Ичон-Қалъа» давлат музей-қўриқхонаси ҳудудида айрим чекловлар жорий қилинади

Хоразм вилояти, Хива шаҳрида жойлашган музей-қўриқхонасига 1 февралдан бошлаб тадбиркорлик субъектлари ва корхона-ташкилотларга тегишли транспорт воситалари кириши тақиқланади.

Фото: KUN.UZ

Халқ депутатлари Хива шаҳар кенгаши томонидан «Ичон-Қалъа» давлат музей-қўриқхонаси ҳудудида айрим чекловлар жорий этилиши ҳақида қарор қабул қилинди.

Жумладан, 1 февралдан бошлаб, «Ичон-Қалъа» ҳудудида фаолият олиб бораётган тадбиркорлик субъектлари ва корхона-ташкилотларга тегишли транспорт воситалари музей-қўриқхона ҳудудига киритилмайди.

Бу чора-тадбир тарихий ҳудуд йўллари бузилишининг ва маданий мерос объектлари емирилишининг олдини олиш ҳамда аҳоли билан туристларнинг эркин ҳаракатланишини таъминлаш мақсадида жорий қилинмоқда.

«Ичон-Қалъа» давлат музей-қўриқхонаси ҳудудида яшовчи аҳоли ва ташкилотларга тегишли автомобиллар учун «Ота дарвоза», «Боғча дарвоза», «Тош дарвоза» ҳамда «Полвон дарвоза» ҳудудига яқин жойда автомобиллар тўхташ жойлари ташкил қилинади.