Боливияда самолёт қулаши оқибатида 15 киши ҳалок бўлди

Эл-Алто аэропортига қўнишдан кейин Боливия Марказий банки пулини ташиётган ҳарбий самолёт шоссе йўлига чиқиб кетди. 15 киши ҳалок бўлгани хабар қилинмоқда. Ҳодиса жойида йўлга сочилиб кетган пул сабаб оммавий тартибсизликлар бошланди.

Фото: AP

Боливияда мамлакат ҳарбий-ҳаво кучларига тегишли, Марказий банк пулини ташиётган юк самолёти автомобил шоссесида ҳалокатга учраши натижасида ўн беш киши ҳалок бўлди. Бу ҳақда 28 феврал, шанбага ўтар кечаси маҳаллий ҳокимиятларга таянган ҳолда ахборот агентликлари хабар қилди.

Lockheed C-130 Hercules самолёти Эл-Алто аэропортига (мамлакат пойтахти ҳисобланадиган Ла-Пас шаҳри яқинида жойлашган) Боливия Марказий банки бўлимларида алмаштириш учун мўлжалланган янги банкнотларни олиб келган. Қўнишдан сўнг самолёт учиш-қўниш йўлагидан чиқиб, яқин атрофдаги шоссе йўлига чиқиб кетган ва бир нечта автомобилга зарар етказган. Самолётдаги купюралар ҳалокат жойи атрофига сочилиб кетган. Ҳодисанинг аниқ сабаблари ҳозирча маълум эмас.

Маҳаллий ОАВ қутқарувчиларга таяниб хабар қилишича, ҳалокат қурбонлари камида 15 нафарни ташкил этади.

Ҳодиса жойида полиция ҳам ишламоқда: гувоҳлар самолётдан тушиб кетган пулларни йиғиб олишга уринган. Ҳуқуқ-тартибот идоралари уларга қарши кўздан ёш чиқарувчи газ ва ёнғин машиналаридан сув қўллаган.

Боливия Марказий банки раиси Давид Эспиноса қулаган самолётдан тушиб кетган пуллар ҳали мамлакат ҳокимияти томонидан рўйхатдан ўтказилмагани учун ҳақиқий эмаслигини таъкидлади. У маҳаллий аҳолини уларни қайтаришга чақирди ва бундай купюраларни ўзида сақлаш жиноят деб баҳоланишини қўшимча қилди. Эспиноса, шунингдек, самолёт Боливияга чет элдан учиб келганини айтди, аммо ташилган маблағ миқдорини аниқламади.

Самолёт ҳалокатидан сўнг Боливия ҳокимияти Эл-Алто аэропортидаги барча рейсларни вақтинча тўхтатди.