ОАВ: Трамп Украинадаги тинчлик музокараларига қизиқишини йўқотди

АҚШ президенти Доналд Трамп асосий эътиборини Эрондаги урушга қаратганидан кейин Украинада тинчлик ўрнатиш бўйича музокаралар жараёни чўзилди, деб ёзади Financial Times газетаси Европа расмийларига таяниб. Ўз навбатида, тинчликка мажбурлаш учун АҚШнинг Россияга ўтказаётган босими камайиб бормоқда.

АҚШ, Россия ва Украина ўртасидаги сўнгги уч томонлама музокаралар феврал ойи ўрталарида Женевада бўлиб ўтган, лекин тафсилотлар маълум қилинмаганди.

ОАВдаги маълумотларга кўра, томонлар сулҳ билан боғлиқ техник тафсилотларни (жанглар тўхтатилгандан сўнг нима бўлиши) муҳокама қилишда олдинга силжишган, аммо сиёсий масалаларни, яъни урушни тўхтатиш мумкин бўлган шартларни муҳокама қилишда катта ютуқларга эришилмаган.

Россия украин қўшини Донбассни тўлиқ тарк этишини талаб қилмоқда, Украина эса бу шартни қабул қила олмаслигини таъкидлашда давом этмоқда. Ҳозирда Россия ҳарбийлари назорат қилаётган Запорижжя АЭС мақоми масаласи ҳам сўроқ остида қолмоқда.

Уч томонлама музокараларнинг янги босқичи Яқин Шарқдаги янги уруш туфайли кечиктирилди, президент Трамп эса Украинадан чалғиб, бор эътиборини Эронга қаратди, дея маълум қилди Financial Times нашрига тўрт нафар европалик дипломат. «Бу биз <Европа> учун ҳам, Украина учун ҳам фалокат», – дея қўшимча қилди улардан бири.

«Музокараларда чиндан ҳам пауза юзага келди. Америкаликлар учун ҳозир бошқа приоритетлар бор ва бу тушунарли», – дея тасдиқлаган нашрга Россия президенти матбуот котиби Дмитрий Песков.

АҚШдан Украинага қурол-яроғ, хусусан, ҳаво ҳужумидан мудофаа воситалари етказиб бериш ҳам кечикмоқда, чунки Вашингтоннинг ҳозир бошқа устувор вазифалари бор.

Моҳиятан, Украина ва Яқин Шарқ давлатлари ҳозир Америка ёрдами учун рақобатлашишга мажбур, деб тушунтирди FT’га Европа Иттифоқининг ташқи ишлар ва хавфсизлик сиёсати бўйича олий вакили Кая Каллас.

Россия АҚШ ва Исроилнинг Эрон билан урушидан манфаатдор бўлиб чиқди. Нефт нархи кўтарилди.

Financial Times билан суҳбатлашган экспертларнинг баҳолашича, Эрондаги уруш туфайли Россия ҳар куни 150 миллион долларгача қўшимча даромад олмоқда.

Қолаверса, пайшанба куни АҚШ нархлар ошишини тўхтатиш учун Россия нефтига қўлланган санкцияларни вақтинча бекор қилди. «Бу тинчлик учун ёрдам бермаслиги аниқ», – дея бунга эътироз билдирди Украина президенти Володимир Зеленский.

Трамп: Путинга қараганда Зеленский билан келишиш қийинроқ

Якшанба куни NBC News учун берган интервюсида Трампга унинг Россия нефтига қарши санкцияларни тўхтатиш тўғрисидаги қарори тўғрилигига шубҳа билдирган Европа етакчиларининг танқиди ҳақида савол берилди.

Бунга жавобан Трамп Володимир Зеленскийни танқид қилиб, Украина раҳбари билан келишиш Владимир Путинга қараганда анча қийинлигини айтди.

«Мен Зеленский келишув тузишни истамаётганидан ҳайронман. Зеленскийга айтинг, келишувга борсин, чунки Путин шундай қилмоқчи», – деди у.

Бироқ, биринчи навбатда Россия ён бериш ва муросага тайёр эмас.

Россиянинг музокаралардаги позициясига кўра, украин ҳарбийлари бутун Донбассни, жумладан, Украина назорати остидаги ҳудудларни зудлик билан тарк этиши керак.

Россия президенти Владимир Путин бу шарт бажарилмаган тақдирда
Россияни бу масалани ҳал қилишнинг «ҳарбий» йўли ҳам қониқтиришини бир неча бор таъкидлаган.

Украина расмийлари Путин натижадан манфаатдор эмаслиги, музокаралардан Трамп билан муносабатларни сақлаб қолиш ва Россияга қўшимча санкциялар киритишдан қочиш усули сифатида фойдаланишини айтиб келишади.