«Ўзтрансгаз» АЖ мансабдорларига жиноят иши очилганлиги ҳақидаги миш-мишлар рад этилди

Ижтимоий тармоқларда «Ўзтрансгаз» АЖ мансабдорларига нисбатан жиноят иши очилганлиги ҳақидаги хабарлар тарқалди.

Қайт этилиашича, мансабдорлар 4 триллион 904,7 млрд сўмни растрата қилиш йўли билан талон-тарож қилган. Шунингдек, 7,4 млрд сўм маблағ ортиқча мукофот пуллари сифатида тўлаб берилиб, ўзлаштирилган.

Шу сабабли, «Ўзтрансгаз» АЖ мансабдорларига нисбатан Ўзбекистон Республикаси Жиноят кодексининг 167-моддаси 3-қисми «а» банди ва 175-моддаси 3-қисми «а» банди билан жиноят иши қўзғатилганлиги айтилмоқда.

«Ўзтрансгаз» ахборот хизмати мазкур хабарларга муносабат билдириб, ҳозирда ташкилот тузилмасида ишлаётган ҳеч бир мансабдор шахс бирор жиноий иш доирасида тергов жараёнига жалб қилинмаганлигини маълум қилди.

«Акциядорлик жамияти ўз мансабдор шахсларига нисбатан жиноят иши очилганидан хабари йўқ ва ҳозирда ҳам ҳеч бир мансабдор шахс бирор жиноий иш доирасида тергов жараёнига жалб қилинмаган.

Шу ўринда, барча ОАВ ва блогерларга, «Ўзтрансгаз» АЖ ҳамкорлик учун очиқлиги ҳамда барча саволларга жавоб беришга шайлигини яна бир бор маълум қиламиз», дейилади ташкилот хабарида.

Шунингдек, «Ўзтрансгаз» АЖ юқоридаги хабарларни тарқатган блогерлар устидан ташкилот ходимларига нисбатан туҳмат қилганлик ва ишчанлик обрўсига путур етказганлик бандлари бўйича судга ариза топшириш устида иш олиб бораётганлигини маълум қилди.

Бош прокуратура матбуот хизматининг Kun.uz'га билдиришича, «Ўзтрансгаз» АЖ мансабдорларига жиноят иши очилганлиги ҳақидаги хабарлар ҳақиқатга тўғри келмайди.