Эроннинг тинчлик режаси тафсилотлари маълум бўлди

Эрон ҳукумати томонидан покистонлик воситачилар орқали Вашингтонга юборилган ҳарбий ҳаракатларни тўхтатиш режаси 14 банддан иборат.

Эрондаги Tasnim агентлиги хабарига кўра, Теҳрон илгари сураётган талаблар қаторида қуйидагилар бор:

• ҳужум қилмаслик тўғрисида кафолат;
• Америка қўшинларини Яқин Шарқдан олиб кетиш;
• ҳарбий денгиз қамалини бекор қилиш;
• Эроннинг активларини блокировкадан бўшатиш;
• репарация тўлаш;
• санкцияларни бекор қилиш;
• бутун фронт бўйлаб, жумладан Ливанда ҳам ҳарбий ҳаракатларни тўхтатиш;
• Ҳўрмуз бўғози фаолияти бўйича янги механизм ўрнатиш.

Axios нашри манбага таяниб хабар беришича, Теҳроннинг режасида Ҳўрмуз бўғози фаолиятини қайта тиклаш, АҚШнинг денгиз орқали қамалини тўхтатиш ҳамда урушни узил-кесил тугатиш бўйича музокаралар учун бир ойлик муддат белгиланган.

Келишувга эришилгандан сўнг Эроннинг ядровий дастури бўйича яна бир ойлик музокаралар режалаштирилган, дея таъкидлайди нашр суҳбатдошлари.

АҚШ президенти Доналд Трамп аллақачон Теҳроннинг таклифларига олдиндан муносабат билдирганди.

«Тез орада мен Эрон бизга юборган режа билан танишиб чиқаман, аммо унинг қабул қилиниши мумкинлигини тасаввур қила олмайман, чунки Эрон сўнгги 47 йил ичида инсоният ва дунёга қилган ишлари учун ҳали етарлича тўлов қилмади», – дея ёзган у Truth Social ижтимоий тармоғида.

Апрел ойи бошидан буён Эрон ва АҚШ ўртасида вақтинчалик сулҳ амал қилмоқда. Аммо томонлар ўртасидаги музокаралар боши берк кўчага кириб қолган: улар асосий масалаларнинг (Эрон ядровий дастурини тугатиш ҳамда Ҳўрмуз бўғозини очиш) бирортаси бўйича келишувга эриша олмади.