Индонезияда бортида 280 киши бўлган паром ёниб кетди (видео)

Индонезия соҳиллари яқинида бортида 280 киши бўлган Barcelona V (KM) паромида кучли ёнғин чиқди. Channel News Asia маълумотига кўра, камида уч киши ҳалок бўлган. CNN Indonesia хабарида қурбонлардан бири ҳомиладор аёл бўлгани айтилган.

Бу вақтда паром Талауд оролидан Шимолий Сулавеси провинциясидаги Манадо шаҳрига сузаётганди.

Пастки палубалардан қуюқ қора тутун чиқа бошлагандан кейин кемада ваҳима бошланган ва кўпчилик ўзини денгизга отган.

Ижтимоий тармоқларда тарқалган видеоларда одамлар бақирганча ёрдам сўраётгани акс этган. Шунингдек, кема палубаси тўлиб-тошгани, ундаги ходимлар йўловчиларга паромдан сакрашдан олдин қутқарув нимчаларини тақишда ёрдам бераётганини кўриш мумкин.

Сувга сакраган йўловчилардан бири Абдул Раҳмад Агу қўлида йиғлаётган болакайни тутган ҳолда, сувда туриб ижтимоий тармоқда жонли трансляция бошлаган.

«Ёрдам беринглар, KM Barcelona V ёнмоқда. Бортда ҳали одам кўп. Биз денгизда ёняпмиз, бизга тезроқ ёрдам керак», — деган у жонли эфирда.

Индонезия ҳарбий-денгиз кучлари ёнғин қурбонлари ва жабрланганларни эвакуация қилиш учун учта кема юборди. Эвакуацияга ёрдам бериш учун маҳаллий балиқчилар ҳам жалб этилган. Сўнгги хабарларга кўра, 150 га яқин одам қутқарилган, 130 киши бедарак йўқолган деб ҳисобланмоқда.

Ҳодиса Талис ва Биаро ороллари ўртасидаги сувларда содир бўлган. Тахминларга кўра, ёнғин учинчи палубадан бошланган ва тезда кеманинг барча қисмларига тарқалган. Бу маҳаллий вақт билан тахминан 12:00 да (Тошкент вақти билан 10:00) содир бўлди, деди йўловчилардан бири.