«Кимдир мени жамоада кўришни истамаяпти». Салоҳ шов-шувли интервю берди

«Ливерпул» мавсум стартидаги ғалабали сериядан кейин инқироз кўчасига кириб қолди. Ва ҳозирча вазиятни ўнглашнинг имкони бўлмаяпти. 6 декабр куни АПЛнинг навбатдаги турида мерсисайдликлар яна очко йўқотишди: «Лидс» билан ўйинда аввалига жамоа 2:0 ҳисобида олдинга чиқиб олганди, кейин иккита гол ўтказиб юборди, ўйин охирида Собослаи яна қизилларни ҳисобда олдинга олиб чиқди, аммо 90+6-дақиқада учинчи гол ўтказиб юборилди (3:3). Сўнгги 10 ўйинда атиги икки бор ғалабага эришган «Ливерпул» турнир жадвалида саккизинчи ўринда бормоқда. Мухлисларнинг катта қисми бош мураббий Арне Слот истеъфосини талаб қилмоқда. «Лидс» билан ўйиндан кейин эса клубда навбатдаги жиддий муаммо пайдо бўлди. Жамоанинг узоқ йиллик етакчиси, қаторасига уч ўйинда захирада қолдирилган Муҳаммад Салоҳ журналистлар қаршисига чиқди ҳамда мураббий билан ўртасидаги олдинги муносабат қолмаганини очиқ айтди. Шунингдек, қишда кетиши мумкинлигига ишора қилди.

У «Вест Ҳэм» ва «Лидс»га қарши ўйинда умуман майдонга чиқмади, «Сандерленд» билан ўйинда эса иккинчи бўлимда захирадан тушганди.

Қаторасига уч ўйинда захирада қолиши Салоҳнинг «сабр косасини тўлдирди». Унинг ҳисоблашича, Слот уни «Ливерпул» муаммоларида асосий айбдор сифатида кўрсатмоқда.

Клубдан ҳафсаласи пир бўлгани ҳақида

«Мен жуда-жуда хафаман. Бу клуб учун йиллар давомида, айниқса ўтган мавсумда қанча меҳнат қилганимни ҳамма кўриб турибди. Бунга ишона олмайман, яна 90 дақиқа захира ўриндиғида қолдирилдим. Бу учинчи мартаси. Менимча, фаолиятимда илк бор шунақа бўлмоқда. 

Мен ҳозир захирада ўтирибман ва нега бундай бўлганини билмаяпман. Афтидан, клуб айбни менга ағдармоқда. Мен шуни ҳис қиляпман. Менимча, бу мутлақо равшан: кимдир ҳамма айб менинг зиммамда бўлишини хоҳлаган.

Клуб ёзда катта ваъдалар берганди, энди эса уч ўйинда майдонга туширилмадим. Улар ваъдасида туришди дея олмайман.

Мен бундай вазиятга кўника олмайман. Мен бу клуб учун жуда кўп иш қилгандим».

Арне Слот ҳақида

«Мен кўп марта бош мураббий билан муносабатим яхши эканини айтганман. Ҳозир эса ҳеч қандай муносабат қолмади. Менимча, кимдир мени клубда кўришни хоҳламаяпти.

Яна бир бор айтаман: энди ўртамизда ҳеч қандай муносабат йўқ. Жуда яхши муносабат бўлганди, энди эса бирдан йўқ бўлиб қолди. Кеча у бошланғич таркибда тушмаслигимни айтди ва мен у билан учрашдим. У нималар ҳис қилаётганимни билади. У бундан хабардор».

Келажаги ҳақида

«Мен доимо бу клубга мухлислик қиламан. Фарзандларим уни доим қўллаб-қувватлайди. Мен бу клубни жуда яхши кўраман ва доимо шундай бўлиб қоламан. Кеча онамга қўнғироқ қилдим – ҳеч ким асосий таркибда чиқиш ёки чиқмаслигимни билмасди, лекин мен билардим.

Кеча [ота-онамга] айтдим: ««Брайтон» билан ўйинга келаверинглар. Ўйнайманми, йўқми, буни билмайман, аммо барибир завқ оламан. Тасаввур қиляпман, чунки бундан кейин нима бўлишини билмайман. Мен «Энфилд»да бўлиб, мухлислар билан хайрлашаман ва Африка Кубогига йўл оламан. У ердалигимда нима бўлишини билмайман».

Саудия Арабистонига кетиши эҳтимоли ҳақида

«Мен бу саволга жавоб беришни истамайман».

Шартномаси ҳақида

«Уни имзолаганимдан афсусдаманми? Бу саволга виждонан жавоб бериш мен учун жуда оғир. Бу оғриқли, ҳатто саволнинг ўзи ҳам оғриқли. Бу клуб билан шартнома имзолаганим учун мен ҳеч қачон афсусланмайман. Шартномани узайтириб, фаолиятимни шу ерда якунлайман деб ўйлагандим.

Ҳаммаси қачондир, қандайдир тарзда тугайди, лекин миямда бир фикр айланади: «Нега ҳаммаси айнан шундай тугаши керак?» Чунки мен жуда яхши ҳолатдаман, атиги беш ой олдин мен барча индивидуал мукофотларни қўлга киритгандим, нега энди ҳаммаси шундай кетиши керак? Кечирасиз, жамоадагиларнинг барчаси ҳам яхши формада эмас, аммо ҳозир айнан мен ҳимояланишимга тўғри келмоқда».

Футболчилар билан муносабатлари ҳақида

«Йўқ, йўқ, йўқ (унга жамоадошлари панд бермадими деган саволга жавобан), бу йигитлар мен уларни қанчалик ёқтиришимни билишади. Улар ўйиндан олдин ҳам, ўйиндан кейин ҳам уларни қанчалик қўллаб-қувватлашимни билишади. Мен тажрибали футболчиман. Мен уларни доим қўллаб-қувватлайман, доим тажриба улашаман. Йўқ, йўқ, ўйинчиларнинг бунга дахли йўқ. Улар ҳам мени жуда қўллаб-қувватлашади, шунинг учун ўртамизда фақат улкан муҳаббат ва ҳурмат бор».

Яна бир бор клуб олдидаги хизматлари ҳақида

«Клуб учун қилган ишларимдан кейин бунақа бўлиши чиндан оғриқли. Ўзингиз учун тасаввур қилиб кўришингиз мумкин. Уйдан чиқаётганингда бугун бошланғич таркибда бўлиш-бўлмаслигингни билмайсан. Мен клубни жуда яхши биламан, мен кўп йиллардан буён шу ердаман. Биламан, эртага [Жейми] Каррагер яна ва яна менга ҳужум қилади – танқид қилаверсин, бу нормал ҳолат.

Мен АПЛга келганимдан кейинги даврда клуб учун барчадан кўп гол урдим. Бу даврда бутун АПЛда мендан кўпроқ гол урган ва голли узатма берган бошқа кимдир бор деб ўйламайман. Менимча, бошқа кимдир билан бу иш содир бўлганда, клуб ёнини олган бўларди. Мен эса бунақа вазиятдаги ягона футболчиман. Барча айтяпти: «Мо — муаммо, демак уни четга суриб қўйиш керак». Мен эса муаммо ўзимда деб ўйламайман.

Мен клуб учун боримни бердим. Ўз ўрним учун ҳар куни курашишим шарт эмас, чунки у меники, унга ҳақлиман. Мен клубдан каттароқ эмасман, лекин мен ўйнашга ҳақлиман».

Нотўғри муносабат ҳақида

«Мисол келтириш керакми? Бу аҳмоқлик, аммо афсусдаман. Ёдимда, қайсидир паллада Ҳарри Кейн ўн ўйинда гол урмаганди ва медиадагиларнинг барчаси шундай деганди: «Ҳарри гол уради ҳали». Иш Салоҳга келганда эса барча шундай демоқда: «У захирада ўтириши керак». Узр, Ҳарри!»

Буёғига нима бўлади?

Бу вазиятда мураббийнинг қарорини ҳам тўғри тушуниш мумкин: жорий мавсумда мисрлик футболчининг ўйинида жиддий пасайиш юзага келди. У мавсум стартидаги 12 ўйинда атиги тўрт гол уриб, икки ассист амалга оширганди, бу эса ўтган мавсумдаги феноменал кўрсаткич (29 гол + 18 ассист) билан солиштирганда жуда камтарона кўринади. 

«Ливерпул» муаммолари фонида кўплаб мухлислар ва экспертлар Муҳаммад Салоҳнинг ўйинидаги пасайишни алоҳида кўрсата бошлаганди.

33 ёшли футболчи ўтган мавсумда шартномасини 2027 йилгача узайтирган.

13 декабр куни «Брайтон»га қарши кечадиган ўйин эса Салоҳ учун клубдаги охирги ўйин бўлиб қолиши мумкин. Шу билан бирга, айримлар у аллақачон мухлислар билан хайрлашди деб ҳисобламоқда: «Лидс» билан ўйиндан кейин Мо майдонга чиқиб, узоқ вақт қолди ва трибунага йиғилганларни олқишлаб турди.

У декабр ойининг иккинчи ярмида Африка кубоги ўйинларига жўнаб кетади, биринчи ўйин – 22 декабр куни бўлиб ўтади. Агар Миср турнирда финалгача етиб борадиган бўлса, у «Ливерпул»га 20 январдан олдин қайтмайди.

Шунингдек, 2026 йилги жаҳон чемпионатигача ярим йил қолмоқда, футболчи турнирга бориши учун спорт формасини юқори ҳолатда сақлаб туриши керак бўлади. У бу ярим йилни қаерда ва қандай ўтказиши ҳозирча катта савол остида.

Салоҳнинг охирги баёноти Криштиану Роналдунинг «МЮ»дан кетиш олдидан Пирс Морганга берган машҳур интервюсини ёдга солиб юбормоқда. Ушбу журналист аллақачон мисрлик футболчини ҳам ўзи билан суҳбат қуришга чорлади. Футболчи бу таклифга рози бўладиган бўлса, португалиялик юлдузникидан кўра шов-шувлироқ интервю чиқиши мумкин.