Туркияда теракт рўй берди

CNN’нинг Туркиядаги бўлими Анқарадаги портлаш ва отишма ҳақида хабар тарқатди.

Euronews маълумотига кўра, террорчилар TUSAŞ авиакосмик компаниясининг ишлаб чиқариш объектига бостириб кирган. «Бизга бу террорчилик акти экани ва ўз жойларимизни тарк этмаслигимиз кераклигини айтишди», — дея манбанинг сўзларини келтирган телеканал.

Каҳраманказан тумани ҳудудида теракт рўй берганини Туркия ИИВ раҳбари Али Ерлиқоя ҳам тасдиқлаган. У теракт оқибатида қурбонлар ва яраланганлар борлигини билдирган.

Манбалар камида уч киши ҳалок бўлганини хабар қилмоқда, улардан бири назорат-ўтказиш жойида турган қўриқчи бўлган.

Ижтимоий тармоқларда тарқалган видеога кўра, жиноятчилар бинога кириш жойига таксида етиб келган, шундан кейин портлаш рўй бериб, отишма бошланган.

Катта эҳтимол билан, террорчилардан бири ўзини портлатган, қолганлари отишма уюштирган.

Айни вақтда ҳудудда отишма давом этмоқда, воқеа жойида полиция бўлинмаси ҳаракатланмоқда.

Тармоқларда ҳужум қилганлардан бирининг кузатув камерасига тушиб қолган тасвири тарқалган. У турникетлардан ошиб ўтиб, ичкарига ҳаракатланган.

Туркиянинг NTV телеканали террорчилар ходимларни гаровга олганини тахмин қилмоқда. Улар автомат ва тўппончалар билан қуролланган ва ёнида кўп миқдорда ўқ-дорига эга бўлиши мумкин.