Тошкентда Malibu капотида ЙПХ ходимини судраб кетган ҳайдовчи қўлга олинди

ИИВ Йўл ҳаракати хавфсизлиги хизмати Тошкент шаҳрида ЙПХ ходимлари қоидабузар ҳайдовчини куч ишлатиб тўхтатгани тасвирланган ҳолат юзасидан маълумот берди.

Қайд этилишича, 5 апрел куни соат 16:55 ларда Миробод тумани Нукус – Абдулла Қаҳҳор кўчалари кесишган чорраҳада ҳайдовчи С.М. давлат рақам белгилари ўзбошимчалик билан ечилган, махсус антенна ва «сирена» мосламаси ўрнатилган Malibu-2 русумли автомобилда катта тезликда ҳаракатланиб, ўзи ва ўзгаларнинг ҳаётини хавф остига қўйган.

Шунингдек, ҳайдовчи бир неча маротаба ЙПХ ходимларининг тўхташ ишораларига бўйсунмасдан ҳаракатни давом эттирган. Ҳайдовчи ЙПХ ходими яқинлашаётганини кўриб турса-да, тўхтамаган ва уни автомобили билан туртиб юбориб, Нукус кўчаси бўйлаб капот устида судраб кетган.

Ходим тан жароҳати олгани сабабли шифокорлар томонидан биринчи тез тиббий ёрдам кўрсатилган.

Машина бошқарувида бўлган фуқаро ўзининг ишсиз экани, транспорт воситасини ижарага олганини маълум қилган. «Ёшлик қилдим, [ЙПХ ходими] капотдан тушиб қолади деб ўйладим», — дейди ҳайдовчи.

Ҳолат юзасидан Тошкент шаҳар Миробод тумани прокуратураси томонидан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноий иш қўзғатилиб, ҳозирда дастлабки тергов ҳаракатлари олиб борилмоқда.