Франциянинг Ўзбекистондаги янги элчиси иш бошлади ва ўзбек тилида мурожаат қилди

Франциянинг Ўзбекистондаги янги элчиси Валид Фук 27 август куни ўз вазифасини бажаришга киришди, деб хабар берди элчихона матбуот хизмати.

Дипломат ўзбек тилидаги мурожаат қилиб, «минг йиллик маданияти ва меҳмондўстлиги билан машҳур Ўзбекистонда иш бошлаганидан хурсандлигини» билдирди.

«Сиз билан ҳамкорлик қилиш ва мамлакатларимизнинг тарихий яқинлашувига кўмаклашиш учун барча саъй-ҳаракатларни амалга ошираман... Келгуси ойларда сиз билан бирга Франция ва Ўзбекистонни боғлаб турган дўстлик ришталарини мустаҳкамлаш ва умумий келажакни қуриш учун барча ҳудудларга ташриф буюриш ниятидаман», деди элчи.

Валид Фук мурожаатида Франция билан лойиҳалар ишлаб чиқишга, саёҳат қилиш ёки таълим олиш учун Франция билан танишишга, Ўзбекистонда мавжуд француз муассасаларида, хусусан, Тошкент ва Самарқанддаги Француз альянсларига боришга чақирди.

Валид Фук Париж Сиёсий тадқиқотлар институтини тамомлаган, сўнгра Франция Ташқи ишлар вазирлигининг Стратегик масалалар, хавфсизлик ва қуролсизланиш бошқармасида ишлаган (2010−2014).

Шу билан бирга, кейинчалик Франциянинг Пекиндаги элчихонасида сиёсий маслаҳатчи, Франциянинг БМТ доимий ваколатхонасида сиёсий маслаҳатчи бўлиб ишлаган. Шунингдек, 2020-2025 йилларда Франция президентининг Осиё, Океания ва Америка бўйича маслаҳатчиси бўлган.

Валид Фук янги лавозимда 2021 йилдан буён фаолият юритган Орелия Бушез ўрнини эгаллади.