Макрон ЕИ қонуни сабаб киритилган АҚШ санкцияларини қоралади

АҚШнинг беш нафар европаликка нисбатан визавий чекловлари қўрқитишдир, деди Франция президенти. Санкцияларга учраган Германиянинг HateAid ННТ раҳбар аёллари ҳам бу қарорни танқид қилди.

Фото: Olivier Matthys/EPA

Франция Оқ уй томонидан ЕИнинг рақамли хизматлар тўғрисидаги директиваси (Digital Services Act, DSA)ни ишлаб чиқишда иштирок этган беш нафар европаликка нисбатан АҚШга кириш бўйича жорий этилган чекловларни қоралайди. Бу ҳақда Франция президенти Эммануэл Макрон 24 декабр, чоршанба куни баёнот берди.

“Бу чоралар Европанинг рақамли суверенитетига нисбатан қўрқитиш ва мажбурлаш ҳисобланади”, — деб ёзди Макрон X ижтимоий тармоғида. У DSA Европа парламенти ва ЕИ Кенгаши томонидан демократик жараён доирасида қабул қилинганини таъкидлади ҳамда қонун Европада “платформалар ўртасида ҳалол рақобатни таъминлаш ва онлайн муҳитда аллақачон амал қилаётган қоидаларга риоя этилишини таъминлаш” учун қўлланишини айтди.

24 декабр куни АҚШ Давлат департаменти ЕИ ички бозор масалалари бўйича собиқ комиссари Терри Бретонга, Британиядаги Global Disinformation Index (GDI) нодавлат ташкилоти раҳбари Клэр Мелфордга, Германиядаги HateAid нодавлат ташкилоти раҳбарлари Анна-Лена фон Ходенберг ва Жозефине Баллонга, шунингдек, Вашингтондаги Рақамли нафратга қарши кураш маркази (CCDH) ижрочи директори, британиялик Имран Ахмедга кириш визаларини беришдан бош тортишга қарор қилди. Охиргисига АҚШда қолиш (турар жойда бўлиш) ҳуқуқидан маҳрум этилиш хавфи туғилиши мумкин.

АҚШ давлат котиби Марко Рубио санкциялар қўлланган шахсларни “радикал фаоллар” деб атаб, улар “ўз мавқеидан фойдаланиб, америкалик шахслар ва компанияларга қарши қаратилган цензура чораларини илгари сурганини” айтди.

Интернетда нафратга қарши кураш билан шуғулланадиган Германиянинг нотижорат ташкилоти HateAid раҳбарлари АҚШ Давлат департаменти айбловларини қатъий рад этди. “Бизнинг ишимиз цензурага ҳеч қандай алоқадор эмас. Аксинча, биз интернетда қонунларга риоя этилишини ва одамлар айнан шу қонунлар доирасида ўз фикрини эркин билдириши мумкин бўлишини истаймиз”, — деди 24 декабр куни Жозефине Баллон.

Ушбу немис ННТнинг яна бир раҳбари Анна-Лена фон Ходенберг эса кириш тақиқи HateAid АҚШ президенти Доналд Трамп маъмуриятига “тегиб кетганини” кўрсатишини билдирди. Фон Ходенберг, ЕИ қонунчилигини изчил амалга ошириш катта платформаларга катта маблағларга тушиши сабабли, бу ерда йирик платформаларнинг иқтисодий манфаатлари хатар остида турганини таъкидлади.

Ҳуқуқ ҳимоячиси айтишича, ҳозир HateAid ходимлари ташкилотнинг банк ҳисоблари қанчалик ҳимояланганини текширмоқда. Улар АҚШдан бўлган хизмат кўрсатувчи провайдерлар ННТга нисбатан қўшимча чоралар кўриши мумкинлигидан хавотирда.