Трамп Конгрессни Эрон билан уруш тўхтагани ҳақида хабардор қилди

АҚШ президенти Доналд Трамп 1 май куни Конгрессга хат йўллаб, Эрон билан апрел ойидаги оташкесим келишуви урушни тўхтатганини маълум қилди. Бу ҳақда Reuters агентлиги хабар бермоқда.

Бу орқали ҳукумат парламентдан бу уруш учун рухсат олишга мажбур бўлмаганини урғуламоқда.

1973 йилги қонунга кўра, Америка президенти Конгресс рухсатисиз ҳарбий ҳаракатлар бошлаган тақдирда, уни 60 кундан узоқ давом эттириши мумкин эмас.

Доналд Трамп жорий йил феврал ойининг сўнгги кунида бошланган уруш ҳақида Конгрессни икки кун ўтиб хабардор қилган, натижада 60 кунлик муҳлат расман 1 май санасига келиб якунига етди.

Трамп шу куни қонунчиларга йўллаган хатида оташкесим кучга кирганидан бери томонлар бир-бирига ўт очмаганини билдирган.

“2026 йил 28 феврал куни бошланган ҳарбий ҳаракатлар тўхтаган”, дейилади мактубда.

Конгрессдаги демократлар ўт очишнинг тўхтатилиши уруш тугаганини англатмаслигини таъкидламоқда. Улар АҚШ ҳарбий кемалари Эрон нефт экспортига тўғаноқ бўлиб турганини ҳарбий ҳаракатлар амалда давом этаётганини исботи сифатида келтирмоқда.

“Низо бошланганига 60 кун бўлди, президент Трампда ҳалигача тайинли режа қилинмаган бу урушдан чиқишнинг йўли ёки стратегияси йўқ”, – деди сенатор Жинн Шейҳин.

Трамп ҳам ўз мактубида низо бартараф этилмаган бўлиши мумкинлигини тан олган ва Эрон ҳалигача АҚШ ва унинг қуролли кучларига “жиддий” таҳдид бўлиб турганини иддао қилган.

1 май куни Теҳрондаги IRNA давлат ахборот агентлиги Эрон томонидан воситачи Покистон орқали АҚШга янги келишув таклифи йўлланганини маълум қилди.