«Мобил эксперт»: Келажакда экспертиза натижалари телефонга юборилади

Республика суд экспертиза маркази бўлим бошлиғи Мурод Ёқубов Kun.uz'га берган интервьюсида суд-экспертиза соҳасини рақамлаштириш бўйича кўзда тутилаётган ишлар ҳақида маълумот берди.

Унинг айтишича, ишлаб чиқарилиши режалаштирилган «Мобил эксперт» дастури орқали пулли хизматларга пул тўлаш, келажакда эса экспертиза натижаларини электрон равишда қабул қилиб олиш имконияти яратилади.

«Республика суд-экспертиза маркази, тақдим этиладиган хизматлар ва уларнинг нархлари ва бошқа маълумотлар билан мунтазам танишиб бориш имконини берувчи «Мобил эксперт» дастурини ишлаб чиқиш режалаштирилган. У Android ва iOS платформаларида ишловчи мобил илова бўлиб, фуқаролар марказимиз томонидан кўрсатиладиган пулли хизматларга ушбу илова орқали пул тўлаши, келажакда экспертиза натижаларини электрон равишда қабул қилиб олишлари мумкин бўлади», — деди Мурод Ёқубов.

Президентнинг 2019 йил 17 январдаги «Суд-экспертлик фаолиятини янада такомиллаштириш чора-тадбирлари тўғрисида»ги қарори билан 2019-2020 йилларда суд экспертлик фаолиятини янада такомиллаштириш бўйича йўл харитаси тасдиқланган.

**Республика суд экспертиза маркази бўлим бошлиғи Мурод Ёқубов**

Мазкур ҳужжатда суд-экспертиза хизматлари фаолиятига янги инновацион ишланмалар, автоматлаштирилган ахборот-қидирув тизимлари ва компьютер дастурлари, электрон маълумотлар базаларини жорий этиш, суд экспертларининг автоматлаштирилган иш ўринларини ташкил этиш, идоралараро электрон ҳужжат айланиши тизимини йўлга қўйиш белгиланган.

Бундан ташқари, кўрилаётган иш натижасидан манфаатдор бўлган томонлардан бирининг ёки бошқа шахсларнинг фойдасига хулоса олиш учун суд экспертига таъсир кўрсатиш ҳолатлари, шунингдек, суд эксперти томонидан коррупция ҳолатларига йўл қўймаслик мақсадида тадқиқот объектларини шифрлаш (кодлаш) тизимини амалиётган татбиқ этиш режалаштирилган.

«Йўл харитасида экспертнинг электрон иш столини яратиш белгиланган. Бу нима дегани? Марказимиз ва ҳамкор ташкилотлар орасидаги хатлар, ҳужжатлар — ҳаммасини электрон шаклда айланиши йўлга қўйилади.

Бугунги кунда битта экспертизани олиб бориш учун 10-15 кун вақт сарфланса, бунинг асосий қисми қоғозбозликка кетади. Тизим электронлаштирилса, экспертнинг битта тадқиқотни ўтказиш учун сарфлайдиган вақти қисқаради. Натижада, у бир кунда аввалгидан кўпроқ экспертизаларни ўтказа олади. Бу эса суд ва тергов ишлари ҳам тезлашишига олиб келади.

Бу борада танлов ўтказилиб, ғолиб ташкилот билан шартнома тузилган, ҳозирги кунда дастур лойиҳаси ишлаб чиқилмоқда», — деди Мурод Ёқубов.

Аввалроқ Ўзбекистонда Ўзбекистонда одамнинг турли касалликларга генетик мойиллигини ҳамда шажарани аниқлаш имконини берувчи янги экспертиза жорий этилиши, оталикни аниқлаш бўйича ДНК экспертизасини ўтказиш нархи маълум қилинган эди.