Қўшимча функционаллар
-
Тунги кўриниш
Оқ уй «Трампнинг ўлими» ҳақидаги миш-мишларни рад қилди
Расмийларнинг таъкидлашича, Трамп билан ҳаммаси жойида ва у бугун голф ўйнамоқда. Матбуотда АҚШ президентининг кеча, жума куни олинган интервюси ва бу интервюдан олинган сурат пайдо бўлди.
Фото: Оқ уй матбуот хизмати
АҚШ президенти Доналд Трамп билан ҳаммаси жойида, деди Axios журналисти Барак Равидга исми ошкор этилмаган америкалик амалдор.
«Америкалик амалдор менга шундай деди: «Трамп билан ҳаммаси жойида. Бугун эрталаб у голф ўйнамоқда», деб ёзди Равид Х ижтимоий тармоғида.
Бугун, шунингдек, Daily Caller нашри АҚШ президенти билан кеча, 29 августда олинган интервюни ҳам эълон қилди. Интервюга илова қилинган суратда суҳбат Оқ уйда кечгани, унда АҚШ президентининг ташқи кўриниши одатдагидек эканини кўриш мумкин.
«Трампнинг ўлими» ҳақидаги миш-мишларга у бир неча кун жамоатчилик қаршисида кўриниш бермагани, ундан сал аввалроқ вице-президент Жеймс Вэнснинг агар Трамп билан бирор нарса содир бўлса, АҚШ президенти бўлишга тайёрлиги ҳақидаги айтганидан кейин пайдо бўлди. Шу билан бирга, Вэнс президентнинг аҳволи яхши экани ва президентлик муддати охиригача ишлай олишига ишонч билдирган эди.
Шу фонда X платформасидаги машҳур мавзуларидан бири Трампнинг ўлими ҳақида (#TrumpIsDead) бўлди. Бу тег бўйича ижтимоий тармоқларда ўн минглаб постлар қолдирилди.
Трамп 79 ёшда. Апрел ойида Оқ уй унинг навбатдаги тиббий кўрик натижаларини эълон қилди, унда президентнинг ақлий саломатлиги яхши экани айтилган. Хулосада, шунингдек, Трамп фақат холестерин даражасини назорат қилиш учун дорилар, «юрак профилактикаси» учун аспирин ва тери касалликларини даволаш учун мометазонли кремдан фойдаланаётгани айтилган.
