Москвадаги музокаралар: Уиткофф қисқичбақали чебурек ва пишлоқли нон еган. Кремл бошқа нарсалар ҳақида жим

2 декабр куни кечқурун Доналд Трампнинг махсус вакили Стивен Уиткофф ва АҚШ президенти куёви Жаред Кушнер Москвада Владимир Путин билан музокаралар ўтказди. Учрашув беш соатга яқин давом этган.

Музокаралар якунланиши билан Россия президенти ёрдамчиси Юрий Ушаков томонлар «бўлиб ўтган музокаралар моҳиятини ошкор қилмасликка» қарор қилганини айтди. У фақат америкаликлар қандайдир «27 банддан иборат ҳужжат»ни, шунингдек, яна тўртта ҳужжатни топширганини, уларнинг барчаси биргаликда тинчлик режасини ташкил этишини таъкидлади. Уларнинг моҳиятига аниқлик киритишдан бош тортган.

Ушаков фақат «энг муҳим» ҳудудлар масаласига алоҳида тўхталган. Унинг сўзларига кўра, ҳозирча бу борада муросага келинмаган. Президент ёрдамчиси айтишича, Американинг баъзи ишланмалари «у ёки бу даражада маъқул», аммо бошқалари Россияга «тўғри келмайди». Ушаков музокаралар давом эттирилишини билдирган.

«Биз америкалик ҳамкасбларимиз билан америкаликлар бир муддат олдин Москвага етказган лойиҳалар ва ҳужжатларнинг мазмунини муҳокама қилдик. Аниқ формулировкаларни эмас, балки ушбу Америка ҳужжатларига киритилган ғояларнинг моҳиятини гаплашдик. Баъзи нарсаларга рози бўлишимиз мумкин эди ва президент буни суҳбатдошларига тасдиқлади. Баъзи ишланмалар эса танқидимизга сабаб бўлди ва президент ҳам бир қатор таклифларга нисбатан танқидий ва ҳатто салбий муносабатимизни очиқ айтди», – деган у.

Учрашувнинг аниқ натижалари йўқлиги сабабли, Россия давлат оммавий ахборот воситалари Уиткофф ва Кушнернинг тушлигига катта эътибор қаратди – музокаралар олдидан улар Кремл яқинидаги Savva номли ресторанга ташриф буюришган. Кремлдаги журналистларга кўра, тушлик уларга 25 минг рублга тушган бўлиши мумкин.

«Биз иссиқ газаклардан қисқичбақа қўшилган посикунчикларни таклиф қилдик – булар мини-чебуреклар. Маълумки, жаноб Уиткофф чебурек ва қовурилган қарсилдоқ хамирни жуда хуш кўради. Столда ўзимизнинг қўзиқоринли чучвараларимиз ҳам борди. Иссиқ таомга гречкали қийма бедана, кийик гўшти, димланган палтус ҳамда ва балиқли кулебяка тортилди», – деган «Москва 24» телеканалига ресторан директори Максим Романцев. Нашрнинг аниқлик киритишича, Уиткоффга энг кўп ёққан таомлар қисқичбақали чебурек ва пишлоқли нонлар бўлган.

Бугун бўлиб ўтган брифингда Россия президенти матбуот котиби Дмитрий Песков яна бир бор такрорлади: Москва тинчлик жараёни доирасида сукунат тамойилига амал қилишда давом этади. «Бу музокаралар қанчалик тинч ўтказилса, шунчалик самарали бўлади», – деди у. Песков, шунингдек, Путин АҚШнинг режасини рад этди, дейиш нотўғри бўлишини қўшимча қилган.

Уиткофф ва Кушнер ҳеч қандай изоҳ беришмади. АҚШ давлат котиби Марко Рубио учрашувдан бир неча соат ўтиб, Fox News телеканалига берган интервюсида асосий келишмовчиликлар Донбасснинг кимга тегишлилиги масаласида эканини тасдиқлади (интервю пайтида у Москвадаги музокаралар натижаларидан хабардор бўлган ёки йўқлиги аниқ эмас).

«Ҳозир улар том маънода 30–50 километрлик ҳудуд ва Донецк областининг қолган 20 фоизи учун курашмоқда. Ва биз қилмоқчи бўлган нарса - ва менимча, маълум тараққиётга эришдик - украинлар нимага рози бўлиши мумкинлигини тушуниш, бу уларга келажакда хавфсизлик кафолатларини беради, шунда уларнинг мамлакати бошқа ҳеч қачон босқинчиликка учрамайди», - деди Рубио.

Бир кун аввал Axios манбалари Кремлдаги музокаралардан сўнг Уиткофф ва Кушнер «Европа давлатларидан бирига» (кейинчалик бу Белгия экани маълум бўлди) жўнаб кетиши ва у ерда Украина президенти Володимир Зеленский билан учрашув ўтказиши ҳақида хабар берганди. Бугун америкалик журналист Алекс Рафоглу ўз манбаларига таяниб, бу учрашув бекор қилингани ҳақида ёзди.