Эрон ТИВ Мужтаба Хоминаий яраланганини тасдиқлади

Эроннинг янги диний раҳбари Мужтаба Хоминаий яраланган, аммо унинг ҳолати яхши. Бу ҳақдаги маълумотни Эрон ташқи ишлар вазирлиги вакили Исмоил Бақоий Италиядаги Corriere della Sera газетасига берган интервюсида тасдиқлаган.

«У яраланган, аммо у билан барчаси жойида, мен у қачон илк бор чиқиш қилишидан хабардор эмасман», – деган Бақоий.

У шунингдек, Али Хоминаийнинг ўрнини эгаллаш учун «уч-тўрт номзод» бўлгани, аммо Экспертлар кенгаши аъзоларининг кўпчилик қисми Мужтаба Хоминаий номзодини танлашганини қўшимча қилган.

Эроннинг Кипрдаги элчиси Алиризо Салариён ҳам Мужтаба Хоминаий 28 феврал куни отаси ва оила аъзолари ҳалок бўлган ҳужум вақтида яраланганини тасдиқлаган. «У ҳам ўша ерда бўлган ва ўша бомбардимон пайтида жароҳат олган, лекин бу ҳақда хориждаги янгиликларда ёзишганини кўрмадим. Эшитишимча, у оёғидан, шунингдек, қўли ва билагидан яраланган», – деган элчи The Guardian учун интервюсида.

Мужтаба Хоминаий яралангани ҳақида дастлаб 7 март куни Исроилдаги «12 канал» ўз манбасига таяниб хабар тарқатганди. Телеканал маълумотига кўра, у 28 феврал куниёқ – АҚШ ва Исроилнинг Эрон бўйлаб йўллаган дастлабки авиазарбалари оқибатида яраланган. Кейинроқ The New York Times нашри ҳам Хоминаий урушнинг илк кунида оёғидан жароҳатлангани ва шунинг учун омма қаршисига чиқмаётгани ва сайланганидан кейин ҳеч қандай баёнот бермаётганини хабар қилди.

Эронда янги диний раҳнамо сайлангани ҳақида 8 март куни эълон қилинганди. 56 ёшли Мужтаба Хоминаий – Исроил ва Америка ҳарбийларининг 28 феврал куни йўллаган авиазарбалари оқибатида ҳалок бўлган Али Хоминаийнинг иккинчи ўғли ҳисобланади. Диний раҳнамонинг Теҳрондаги қароргоҳига зарба оқибатида Мужтаба Хоминаийнинг отаси Али Хоминаийдан ташқари, онаси Мансура Хўжаста Боқирзода, турмуш ўртоғи Заҳро Ҳаддод Одил ҳамда ўғли ҳам ҳалок бўлганди.