Пентагон раҳбари Венесуэладаги Россия мудофаа тизимлари ҳақида ҳазил қилди

АҚШ мудофаа вазири Пит Ҳегсет АҚШ қўшинларининг Венесуэладаги ҳарбий операцияси вақтида мамлакат армияси авиация зарбаларини қайтаришга уринмагани ҳақида ҳазил қилди. Ушбу операция Николас Мадуронинг қўлга олиниши билан якунланган. Дүшанба, 5 январ куни Виржиния штатида ҳарбийлар олдида нутқ сўзлар экан, Ҳегсет америкаликлар Каракасга йўқотишларсиз киргани билан мақтанди.

“Уч кеча олдин Венесуэлада қарийб 200 нафар энг яхши америкалик фуқароларимиз Каракас марказига кирди…” — деди Ҳегсет ва операция бирорта ҳам АҚШ ҳарбий хизматчисининг ҳалок бўлишисиз ўтганини таъкидлади. “Худди ўша Россия ҲҲМ тизимлари унчалик яхши ишламаган, тўғрими?” — деб ҳазил қилди у.

Шу чиқиши давомида Пит Ҳегсет АҚШ бошқа давлатлар билан можароларга интилишини айтмади, бироқ дунё “супердавлатлар рақобатининг янги даври”га кирганини билдирди. Бу контекстда АҚШ мудофаа вазири тўғридан тўғри фақат Хитойни тилга олди. Ҳегсетнинг айтишича, АҚШ “бу чақириққа жавоб бериш учун юксалади” ва мудофаа соҳасига “келажакдаги жангларда устунлик қилиш учун керак бўладиган” технологияларни жорий этади.

ОАВ қайд этишича, Россия 2000-йилларнинг ўрталарида, АҚШ буни тўхтатгандан сўнг, Венесуэла учун асосий қурол-яроғ етказиб берувчилардан бирига айланган. Бу соҳадаги шартномаларнинг умумий қиймати тахминан 14,5 миллиард доллар бўлган. Бунда РФ ҳукумати Каракасга техникани кредитга олиш имконини берган ва қарзларни тўлаш муддатларини кечиктирган.

Россиядан Венесуэлага етказиб берилган қуроллар орасида самолётлар, вертолётлар, ерусти ҳарбий техникаси, шунингдек ҲҲМ тизимлари ҳам бўлган. Жумладан, С-300 зенит-ракеталар мажмуаси, “Бук”, совет давридан қолган “Печора-2М” ЗРКнинг модернизация қилинган турлари ва кўчма “Игла” зенит-ракета мажмуалари.

2025 йил май ойида Николас Мадуро Москвага ташриф буюриб, Россия президенти Владимир Путин билан бирга стратегик шериклик тўғрисидаги шартномани имзолаган. Ҳужжат, бошқа нарсалар қатори, “икки мамлакат мудофаа қобилиятини мустаҳкамлаш ва хавфсизлигини таъминлаш манфаатларида” ҳарбий-техник ҳамкорликни назарда тутган.

“Мутлақ қатъият” деб номланган АҚШ операцияси Венесуэлада 3 январга ўтар кечаси бўлиб ўтган. ОАВ маълумотларига кўра, унда Венесуэланинг шимолидаги объектларга, жумладан Каракасга зарбалар бериш учун 150 дан ортиқ самолёт ва учувчисиз аппаратлар жалб қилинган.

Таҳлилчилар операция пайтида АҚШ авиацияси деярли ҳеч қандай қаршиликка учрамаганини таъкидлайди: фақат битта вертолёт шикастлангани ҳақида хабар берилган. Бу АҚШ Венесуэла генералларини пора билан ўзига оғдирган бўлиши мумкин, деган тахминларга сабаб бўлди, аммо бундай назариялар учун далиллар йўқ.

Шу билан бирга, Венесуэла ҳарбийлари Каракас яқинидаги авиация ҳабларида учиш-қўниш йўлакларини тўсиб қўйгани маълум. Бу ҳаракатлар АҚШ эҳтимолий оккупация уринишида десант туширилишининг олдини олиши мумкин эди. Бироқ кейинроқ маълум бўлишича, АҚШ операциясининг мақсади айнан Мадурони қўлга олиш бўлган. Шунинг учун “Делта” махсус кучлари аввалдан репетиция қилинган сценарий бўйича вертолётлардан тўғридан тўғри Венесуэла раҳбарининг резиденцияси ёнига туширилган. Натижада Мадуро хотини билан бирга қўлга олинган ва АҚШга олиб чиқиб кетилган, у ерда жуфтлик наркотрафик (гиёҳванд моддалар савдоси) айбловлари бўйича судга келтирилди. Мадуро ўзини айбсиз деб эълон қилган.