Трамп Ҳўрмуз бўғози блокадаси ҳақида эълон қилди

АҚШ президенти Доналд Трамп мамлакат ҳарбий-денгиз кучлари «Ҳўрмуз бўғозига киришга ёки ундан чиқишга уринадиган барча кемаларнинг йўлини ҳеч қандай истисноларсиз тўсиб чиқиши»ни маълум қилди.

У блокада яқин вақтлар ичида бошланиши, унга бошқа мамлакатлар ҳам қўшилишини қайд этган.

Шунингдек, Трамп флотга Эронга тўлов қилиб бўғоздан ўтаётган кемаларни аниқлаш ва қўлга олишни буюрган. «Ноқонуний бож тўлаганларнинг ҳеч бири очиқ денгизда хавфсиз ўтиш имконига эга бўлмайди», — деган АҚШ президенти.

У АҚШ Ҳўрмуз бўғозини миналардан тозалашни бошлашини ҳам ваъда қилган. «Бизга ёки кемаларга ўт очган ҳар қандай эронлик тўғридан тўғри жаҳаннамга равона қилинади!» – дея қўшимча қилган Трамп.

Америка ва Эрон ўртасида 11-12 апрел кунлари Покистонда бўлиб ўтган музокаралар ҳақида гапираркан, Трамп томонлар ядро муаммоси бўйича келиша олмаганини маълум қилган.

Музокаралар давом этаётганида, 11 апрел куни Трамп АҚШ ҳарбийлари «Ҳўрмуз бўғозини тозалаш жараёнини бошлагани» ҳақида маълум қилганди.

АҚШ ва Эрон 8 апрелга ўтар кечаси ҳарбий ҳаракатларни икки ҳафта муддатга тўхтатиб туриш бўйича келишувга эришганди. Сулҳдаги муҳим шартлардан бири Ҳўрмуз бўғози (дунёда ташиладиган нефтнинг бешдан бир қисми ушбу сув йўл орқали ўтади) очилиши эди. Сулҳнинг илк кунида Эрон бир неча кемани ўтказди, кейин эса Исроил Ливанни ўққа тутаётгани туфайли бўғоз яна ёпиб қўйилди.

The Wall Street Journal газетаси ёзишича, уруш бошланганидан буён Эрон бир неча кемага бир миллион доллар миқдоридаги тўлов эвазига бўғоздан ўтишга рухсат берган. Нашр маълумотига кўра, жами 250 га яқин кема бўғоздан ўтиш учун тўлов қилишга розилик берган.