Ilmiy daraja berishda qator talablar bekor qilinadi

O‘zbekistonda ilmiy daraja olishdagi bir qator byurokratik to‘siqlar bartaraf etiladi.

Prezident farmoniga asosan, 2027 yil 1 yanvardan boshlab ilmiy darajalar berishda quyidagi tartiblar bekor qilinadi:

• chet tili fanidan malakaviy imtihon topshirish, mustaqil izlanuvchilar bundan mustasno;
• Oliy attestatsiya komissiyasi tomonidan dissertatsiya mavzularini ro‘yxatdan o‘tkazish va dissertatsiya himoyasi to‘g‘risida e’lon berish;
• dissertatsiyani yetakchi tashkilotda muhokamadan o‘tkazish;
• ijtimoiy-gumanitar fanlar sohalari bo‘yicha fan doktori (DSc) ilmiy darajasi uchun tayyorlangan dissertatsiya natijalari yuzasidan monografiya e’lon qilish;
• dissertatsiya avtoreferatini chop etish;
• dissertatsiya ilmiy natijasi amaliyotga joriy etilganligi to‘g‘risida xulosa olish;
• Oliy attestatsiya komissiyasining fan tarmoqlari bo‘yicha ekspert kengashi tomonidan dissertatsiyani ilmiy ekspertizadan o‘tkazish;
• himoya qilingan dissertatsiya bo‘yicha ilmiy kengash qarorini Oliy attestatsiya komissiyasi tomonidan tasdiqlash;
• ta’lim va ilmiy-tadqiqot faoliyati uchun jalb qilingan chet ellik fuqaroning xorijda olgan ilmiy darajasi to‘g‘risidagi hujjatlarini nostrifikatsiya qilish. Bunda ilmiy daraja to‘g‘risidagi hujjat uning O‘zbekistondagi faoliyati davomida to‘g‘ridan to‘g‘ri tan olinadi.

Mazkur farmon bilan, Oliy attestatsiya komissiyasi Fanlar akademiyasi tizimiga o‘tkazildi. 2026 yil 1 sentabrdan ayrim doktorantlarning stipendiyasi 1,7 barobarga oshiriladi.

Joriy haftada Oliy attestatsiya komissiyasini 10 yildan ko‘proq boshqargan Ahmadbek Yusupov lavozimidan ozod etildi. Uning o‘rnini kim egallashi hozircha ma’lum emas.

Yangi tartibga ko‘ra, OAK raisi Fanlar akademiyasi prezidenti tavsiyasi asosida, Prezident administratsiyasi bilan kelishilgan holda Vazirlar Mahkamasi tomonidan tayinlanadi va lavozimidan ozod etiladi.