Myanmada odam savdosi qurboniga aylangan O‘zbekiston, Qozog‘iston va Qirg‘iziston fuqarolari o‘z vataniga qaytarildi

O‘zbek, qozoq va qirg‘iz fuqarolari diplomatik vakolatxonalar ko‘magida Myanmadan vatanga qaytarildi. Bu haqda “Dunyo” AA xabar berdi.

Ma’lum qilinishicha, O‘zbekiston Respublikasining Bangkok shahridagi Bosh konsulxonasiga bir guruh fuqarolar Myanmada odam savdosi qurboni bo‘lgani va vatanga qaytishda yordam so‘rab murojaat qilgan.

Murojaatchilarning so‘zlariga ko‘ra, ular Tailandga internetda yuqori maoshli ish taklifi bilan kelishgan. Ularga O‘zbekistondan bepul aviachipta taqdim etilgan. Biroq Tailandga yetib kelganidan so‘ng aldov yo‘li bilan Myanma hududiga noqonuniy ravishda olib o‘tilgan va odam savdosi bilan shug‘ullanuvchi jinoiy guruhlar qo‘liga tushib qolgan. U yerda esa ularni firibgarlik koll-markazlarida ishlashga majburlashgan. Noqonuniy harakatlarni amalga oshirishdan bosh tortgan fuqarolar jismoniy zo‘ravonlik va tahdidlarga duchor bo‘lgan.

Shuningdek, Myanmada xuddi shunday vaziyatda Qozog‘iston va Qirg‘iziston fuqarolari ham odam savdosi qurboniga aylangani aniqlangan. Qirg‘izistonning Tailandda diplomatik vakolatxonasi yo‘qligini inobatga olib, qo‘shni davlat iltimosiga ko‘ra, O‘zbekiston va Qozog‘iston diplomatlari ushbu fuqarolarni ham vatanga qaytarishni tashkil etishda amaliy yordam ko‘rsatgan.

Myanma va Tailandning vakolatli organlari bilan olib borilgan kelishilgan harakatlar va muzokaralar natijasida O‘zbekiston, Qozog‘iston va Qirg‘iziston fuqarolari ozod qilinib, Maesot (Tailand) chegara punktida O‘zbekiston va Qozog‘iston diplomatlariga topshirilgan. Ozodlikka chiqarilgan shaxslarga vaqtinchalik turar joy va oziq-ovqat berilgan.

2025 yil 9 dekabr kuni O‘zbekiston va Qozog‘istonning Tailanddagi diplomatik vakolatxonalari ko‘magida fuqarolar o‘z vatanlariga qaytarilgan.

Avvalroq Olmaotada og‘ir ahvolga tushib qolgan bir guruh fuqarolar O‘zbekistonga qaytarilgandi.