Ayrim talabalarning turar joyda yashash xarajatlari qoplab beriladi

Hukumat qarori bilan tasdiqlangan nizomga muvofiq, davlat oliy ta’lim tashkilotlarida faqat kunduzgi ta’lim shaklida o‘qiydigan talabalarning talabalar turar joylari (TTJ)dagi yashash xarajatlari davlat granti yoki to‘lov-kontraktda o‘qishidan qat’i nazar, davlat budjeti hisobidan qoplab beriladi.

Nizomda belgilanishicha, talabaning TTJdagi yashash xarajatini qoplab berish huquqi uning oilasi Ijtimoiy reyestrning “kambag‘allik chegarasidagi oila” toifasiga kiritilgan sanadan boshlab 12 oy davomida saqlanib qoladi.

Shuningdek, mazkur toifadagi talabalar ustuvorlik asosida, navbatsiz davlat OTMning talabalar turar joyiga qabul qilinadi.

Ariza beruvchi har oyning 7-sanasiga qadar o‘zi tahsil olayotgan oliy ta’lim tashkiloti rektori (filial direktori) nomiga ariza bilan murojaat qiladi.

Talaba arizani mustaqil ravishda kontrakt.edu.uz orqali ham yuborishi mumkin.

Ariza tegishli o‘quv yili uchun bir marta taqdim etiladi.

Fakultetlarda yoshlar bilan ishlash bo‘yicha dekan o‘rinbosarlari (mas’ullar) elektron tarzda kelib tushgan arizalarni 1 kun ichida umumlashtirib komissiyaga taqdim etadi.

Komissiya taqdim etilgan arizalarni 1 kun muddatda o‘rganib chiqadi va tegishli qaror qabul qiladi.