Xitoy Buxoroda oqova suvlarni qayta ishlash loyihasini amalga oshirmoqchi

O‘zbekiston Bosh konsulxonasi xodimlari Xitoyning yetakchi PK Envoronment Corp. kompaniyasi bosh menejeri Yubin Von bilan onlayn shaklda uchrashuv o‘tkazdilar.

Foto: "Dunyo" AA

Muzokaralar O‘zbekiston hududlarida chet el kapitali asosida istiqbolli loyihalarni amalga oshirish maqsadida uyushtirildi.

PK Envoronment Corp. kompaniyasi Xitoyning suv yetishmovchiligi kuzatilayotgan hududlarida innovatsion "yashil" texnologiyalardan foydalangan holda kichik, o‘rta va yirik quvvatdagi qayta ishlash inshootlarini qurish tajribasiga ega.

Bosh menejer Yubin Von ta’kidiga ko‘ra, kompaniya tomonidan amalga oshirilgan loyihalar ekologik jihatdan xavfsiz bo‘lib, mahalliy aholi va tabiatga zarar yetkazmasligi bilan ajralib turadi.

Uchrashuv davomida O‘zbekistonda, xususan Buxoro viloyatida maishiy chiqindilar va oqova suvlarni qayta ishlash, ularni zararsizlantirish orqali qayta ishlatiladigan suv resurslari bilan ta’minlash bo‘yicha loyihani ishlab chiqish masalasi muhokama qilindi.

Viloyatning ushbu sohadagi holati va istiqbollarini o‘rganish maqsadida kompaniya mutaxassislarining mamlakatga safarini amalga oshirishga kelishib olindi.