Havoni ifloslaydigan korxonalarga muhlat berildi: ular monitoring stansiyasini o‘rnatishi shart

O‘zbekistondagi sement zavodlari, neft, gaz, kimyo majmualari, elektr stansiyalar va teri-ko‘nchilik fabrikalari kabi atrof-muhit uchun xavfli korxonalarga 2026 yil 1 martgacha muhlat berildi: ular havo sifatini o‘lchab turuvchi fon monitoring stansiyalarini o‘rnatishi va Ekologiya qo‘mitasi bazasiga integratsiya qilishi shart. Aks holda, tabiatga zarar yetkazganlik uchun kompensatsiya to‘lovlari 5 baravarga oshiriladi.

Foto: Kun.uz

O‘zbekistonda atrof-muhitga ta’sir ko‘rsatish bo‘yicha I va II toifaga mansub sanoat korxonalari 2026 yil 1 martga qadar o‘z hududlarida fon monitoring stansiyalarini o‘rnatishi va ularni Ekologik monitoring milliy markaziga integratsiya qilishi kerak.

Bu topshiriq – Ekologiya qo‘mitasi faoliyatini tashkil etish bo‘yicha prezident qarorida belgilandi.

Qarorga asosan, yuqoridagi topshiriqni o‘z vaqtida bajarmagan korxonalarga nisbatan kompensatsiya to‘lovlari 5 baravarga oshiriladi.

Atrof-muhitga ta’sir ko‘rsatish bo‘yicha I toifa (yuqori darajada xavfli) va II toifa (o‘rtacha darajada xavfli)ga mansub sanoat korxonalari qatoriga, jumladan, sement zavodlari, kimyo komplekslari, elektr stansiyalari, metallurgiya, mashinasozlik, asbest, neft-gaz, kon-boyitish va teri-ko‘nchilik korxonalari kiradi.

Qaror bilan, shuningdek, tabiatga zarar yetkazganlik uchun kompensatsiya to‘lovlaridan imtiyoz olgan sub’yektlarning barchasi bu imtiyozidan mahrum qilindi.

Bundan tashqari, 2026 yil 1 sentabrga qadar yagona ekologik onlayn platforma faoliyati yo‘lga qo‘yilishi kutilmoqda.