Sentyabrdan maktab direktorlarining maoshi oshiriladi

1 sentabrdan e’tiboran, maktab direktorlarining oyligi 20 foizga, direktor o‘rinbosarlarining oyligi 15 foizga oshiriladi. 1 yanvardan boshlab yuqori samaradorlik ko‘rsatgan maktab direktorlari 20 foiz, o‘rinbosarlari esa 10 foiz ustama olishi mumkin bo‘ladi. Bog‘cha mudirlarining ham maoshi ko‘tarilmoqda.

Foto: Kun.uz

O‘zbekistonda maktablar va bog‘chalar rahbarining oyligi oshirilmoqda. Bu – joriy yil mart oyida qabul qilingan prezident farmonida ko‘zda tutilgan.

Farmonga ko‘ra, 2025 yil 1 sentabrdan boshlab:

maktab direktori lavozimining bazaviy tarif stavkasi 20 foizga;
maktab direktori o‘rinbosari lavozimining bazaviy tarif stavkasi 15 foizga oshiriladi.

I va II guruhga kiruvchi bog‘cha direktorlari lavozimlarining bazaviy tarif stavkalari tegishlicha III va IV guruhdagi maktab direktori o‘rinbosari lavozimining bazaviy tarif stavkalariga tenglashtiriladi (ya’ni oshiriladi).

Avvalroq yangi o‘quv yilidan boshlab maktab direktorlari va o‘rinbosarlari hamda bog‘cha mudiralarining ish haqi 7-10 million so‘mdan oshishi aytilgandi.

Yuqoridagi farmonga asosan, 2026 yil 1 yanvardan boshlab, maktablarning direktor jamg‘armasi mablag‘lari hisobidan direktor va uning o‘rinbosarlariga faoliyat samaradorligi ko‘rsatkichlari (KPI) natijasiga ko‘ra 20 va 10 foiz miqdorida har oylik ustamalar belgilanadi.

Barcha maktablarda yangi o‘quv yili 2 sentabrdan boshlanadi

Tayyorlagan: Комрон Чегабоев

#maktab #ish haqi