Bir yillik maktabga tayyorlov majburiy bosqich sifatida joriy etiladi

Farmonga ko‘ra, maktabgacha ta’lim tizimida o‘yinga asoslangan ta’lim amaliyoti bosqichma-bosqich joriy etiladi. Shu bilan birga, tarkibida Bolalarni rivojlantirish innovatsion markazi bo‘lgan «Yangi avlod» maktabgacha ta’lim tashkilotlari tarmog‘i tashkil etilishi nazarda tutilgan.

Bir yillik maktabga tayyorlov guruhlarining dasturlari maktabgacha ta’lim tashkilotlari, umumta’lim maktablari va boshqa ijtimoiy soha obektlarida to‘liq yoki qisqa muddatli guruhlar ko‘rinishida amalga oshiriladi. Shuningdek, maktabgacha va umumiy o‘rta ta’lim xizmatlarini ko‘rsatuvchi nodavlat ta’lim tashkilotlariga ham bir yillik maktabga tayyorlov guruhlarini tashkil etishga ruxsat beriladi.

2027–2028 o‘quv yilidan boshlab maktabga tayyorlov guruhlarida ta’lim jarayonlari oliy ma’lumotli pedagoglar, shuningdek, oliy ta’lim tashkilotlarining bitiruvchi bosqich talabalari tomonidan olib borilishi belgilangan.

Shu davrdan boshlab tayyorlov guruhlarida ta’lim-tarbiya olgan bolalarga bir yillik maktabga tayyorlovdan o‘tganlik to‘g‘risida davlat namunasidagi elektron sertifikat beriladi va ushbu ma’lumotlar umumiy o‘rta ta’lim to‘g‘risidagi shahodatnomada qayd etiladi.

2026–2028 yillarda Qoraqalpog‘iston Respublikasi, viloyatlar markazlari va Toshkent shahrida bittadan davlat maktabgacha ta’lim tashkiloti sifatida faoliyat yurituvchi «Yangi avlod» maktabgacha ta’lim tashkilotlari tashkil etiladi. Ularda rahbar, pedagog va boshqa xodimlar tarif stavkasiga nisbatan 20 foiz miqdorida har oylik qo‘shimcha ustama joriy etilishi ko‘zda tutilgan.

2026–2027 o‘quv yilidan boshlab pedagogika oliy ta’lim tashkilotlarida maktabgacha va boshlang‘ich ta’lim yo‘nalishi bo‘yicha bakalavrlar tayyorlash xalqaro ilg‘or tajriba asosida tashkil etiladi. Shuningdek, o‘rta maxsus ma’lumotli pedagog kadrlar uchun tegishli OTMda maktabgacha ta’lim yo‘nalishida dual ta’lim shaklida, to‘lov-shartnoma asosida bakalavrlar tayyorlash yo‘lga qo‘yiladi. Yangi tashkil etiladigan davlat maktabgacha ta’lim tashkilotlariga, birinchi navbatda, oliy ma’lumotli tarbiyachilar ishga qabul qilinishi belgilangan.

Farmonda, bundan tashqari, 2026 yil 1 apreldan boshlab maktabgacha ta’lim qamrovi 80 foizdan past bo‘lgan tuman (shahar)larda (Toshkent shahri bundan mustasno) tadbirkorlik sub’yektlari uchun qator imtiyozlar joriy etilishi ham ko‘zda tutilgan.