Andijonda o‘qituvchilar ta’mirlagan maktabning direktori ishdan bo‘shatildi

Andijon viloyati, Marhamat tumanidagi 42-umumta’lim maktabi direktori ishdan bo‘shatildi, deb xabar berdi viloyat Maktabgacha va maktab ta’limi boshqarmasi.

Avvalroq, o‘qituvchilar ushbu maktabni ta’mirlayotgani haqida videolavha ijtimoiy tarmoqlarda tarqalgan edi.

«Maktab jamoasi bilan suhbatda ular tomonidan ushbu hashar ixtiyoriy ravishda amalga oshirilgani ta’kidlansa-da, ustozlarni o‘z lavozim majburiyatidan tashqari ishlarni bajarish holatini nazoratga olmagani sababli maktab direktori Z.M. egallab turgan lavozimidan ozod etildi», deyiladi bayonotda.

Qayd qilinishicha, maktab 1982 yilda qurilib, 2005 yilda joriy ta’mirlangan. 2023 yil «Tashabbusli budjet» loyihasi asosida 1 milliard 200 millionlik qiymatga ega eshik va romlar bilan jihozlangan. 2024 yilgi mavsumda 1 milliard 300 million so‘m mablag‘ yutib olinib, sport maydoni qurilgan va maktabning old qismi zamonaviy ko‘rinishga keltirilgan. Hozir maktabda 1 ming 236 nafar o‘quvchiga 74 nafar ustoz ta’lim-tarbiya berib kelmoqda.