Samarqandda 47 kishini chet davlatlarga ishga yuborishni va’da qilgan shaxs ushlandi

Fuqaro 47 nafar fuqaroni aldab, chet davlatlarga ishga yuborishi evaziga jami 37 160 dollarni firibgarlik yo‘li bilan qo‘lga kiritganligi aniqlangan.

Foto: Iqtisodiy jinoyatlarga qarshi kurashish departamenti

Xorijiy davlatlarga ishga yuborishni va’da qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Bosh prokuratura huzuridagi departamentning Oqdaryo tuman bo‘limi va IIB xodimlari hamkorligida tezkor tadbir o‘tkazilgan.

Unda, fuqaro V.I. fuqarolar E.X. va B.B.ning ishonchiga kirib, ularni Angliya davlatiga ishga yuborishi evaziga 4500 AQSh dollarini firibgarlik yo‘li bilan qo‘lga kiritib, tadbir davomida 1,2 mln so‘m va 700 AQSh dollarini qaytarib bergan vaqtida ashyoviy dalillar bilan ushlangan.

Shuningdek, tergovga qadar tekshiruv davomida fuqaro V.I. 47 nafar fuqaroni yuqoridagi kabi aldab, chet davlatlarga ishga yuborishi evaziga jami 37 160 AQSh dollarini firibgarlik yo‘li bilan qo‘lga kiritganligi aniqlangan.

Departamentning Navoiy viloyati boshqarmasi, DXX va IIB xodimlari hamkorligida tezkor tadbir o‘tkazilgan.

Unda, fuqaro R.D. fuqaro A.F.ning ishonchiga kirib, uni Koreya davlatiga yashash va ishlash uchun jo‘natishi hamda viza hujjatlarini tayyorlab berishi evaziga firibgarlik yo‘li bilan 4 000 AQSh dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.