«Nega yoshlarimiz bizdan norozi? Chunki ular bilan zarur darajada shug‘ullanmayapmiz» – Prezident

“Nega yoshlarimiz bizdan norozi? Sababi, maktabni bitirgandan keyin hech kim ular bilan shug‘ullanmayapti. Maktab 11 yil o‘qitib, o‘qishga kirgiza olmayapti. Mayli, o‘qishga kirolmaganiga yarasha biror hunarli bo‘lsin. Hamma ham oliygohga kirishi shart emas, bunga imkoniyat ham yo‘q.

Bola o‘z o‘rnini topa olmay, sarson-sargardon bo‘lmasin. Mana, qishloq xo‘jaligi texnikasi ishlab chiqarishni avtosanoatga qo‘shib berdik. Chunki zamonaviy texnikalar ishlab chiqarmoqchimiz. Ertaga u traktorlarni kimga beramiz. Har biri 150 ming dollarlik traktorlar bor, ularni yoshlar boshqarishi kerak. Musayevga [bosh vazir o‘rinbosari Behzod Musayev - tah.] alohida topshiriq - vazir Shermatov bilan birgalikda maktablarda bu tizimni yo‘lga qo‘yasizlar.

Buxoro muhandislik texnologiya instituti rektori bilan gaplashdim. Mana, “Navoiyazot”dagi uskunalarni deyarli to‘liq yangiladik. Lekin sizlar qaysi texnologiyani o‘qityapsizlar? Javob qoniqarli emas. Eski texnologiya hali o‘zgarmagan. Ertaga bitirgan talabalar nima qiladi?” – dedi davlat rahbari.

Bundan oldin, Shavkat Mirziyoyev Buxorodagi sessiyada qishloq xo‘jaligidagi vaziyat haqida gapirib, bosh vazir o‘rinbosari Shuhrat G‘aniyev ogohlantirilganini aytgandi.