Buxoroda 13 yashar qiz ona bo‘ldi. Gumonlanuvchi qamoqqa olingan

Buxoro viloyatida 13 yoshli qiz farzandli bo‘lgani haqida xabarlar tarqaldi.

Avval tarqalgan mish-mishlarda 12 yoshli qiz o‘gay otasi tomonidan zo‘rlangani aytilgan edi. Bolalar ombudsmani Kun.uz so‘roviga javoban bu ma’lumotni rad etdi. Qayd etilishicha, qiz ayni paytda 13 yoshda bo‘lib, homiladorlik holati homila 6 oylik bo‘lgan vaqtda aniqlangan.

“Holat bo‘yicha Jinoyat kodeksining 118-moddasi 4-qismi (14 yoshga to‘lmagan shaxsning nomusiga tegish) bilan jinoyat ishi qo‘zg‘atilgan. Gumonlanuvchi shaxs o‘gay ota emas, balki oilaga tanish shaxs bo‘lgan. Ushbu shaxs qamoqqa olingan va ayni paytda tergov harakatlari olib borilmoqda.

Bola manfaatida, aybdorga qonundagi eng qat’iy jazo qo‘llanilishini kuzatib boramiz”, deyiladi ombudsman axborotida.

Yaqinda Farg‘onada ham 14 yashar qizning to‘rt nafar shaxslar zo‘rlagani aniqlanib, jinoiy ish qo‘zg‘atilgan edi.

O‘tgan hafta prezident tasdiqlagan 2026 yilgi davlat dasturiga ko‘ra, 14 yoshga to‘lmaganlarga nisbatan jinsiy zo‘ravonliklar uchun umrbod qamoq jazosini joriy etish belgilangan.

Amaldagi qonunchilikka ko‘ra, 14 yoshga to‘lmagan shaxsning nomusiga tegish – 15 yildan 20 yilgacha ozodlikdan mahrum qilish bilan jazolanadi.