Yuqori oktanli benzindan boshqa yoqilg‘ilar uchun aksiz solig‘i stavkalari o‘zgaradi

Bu – 2024 yilgi davlat budjeti qonuni qabul qilinishi munosabati bilan Soliq kodeksiga kiritilgan o‘zgarishlarda ko‘rsatilgan.

Iqtisodiyot va moliya vazirligi 2023 yil oxirida e’lon qilingan Budjetnomada faqat AI-80 benziniga aksiz solig‘i indeksatsiya qilinayotganiga to‘xtalib, buni “aholi salomatligiga salbiy ta’sirlarni kamaytirish va tabiatga keltiriladigan zararlarni qisqartirish maqsadi” bilan izohlagan edi.

AI-91 va undan yuqori oktanli benzin mahsulotlari esa yevrostandart talablariga javob berishi sababli ularga nisbatan amaldagi stavka o‘zgarishsiz qolishi bildirilgan.

Biroq AI-91 benzinidan ham ko‘ra ekologiya uchun zararsizroq yoqilg‘i turlari – suyultirilgan (propan) va siqilgan (metan) tabiiy gaz uchun aksiz solig‘i oshirilayotganiga izoh berilmagan.

Vazirlikka ko‘ra, aksiz solig‘idagi bu o‘zgarishlar AI-80 benzini narxining 1 foizga yoki 88 so‘mga oshishi, metan narxi esa 3 foiz yoki 84 so‘mga oshishiga olib keladi.

Eslatib o‘tamiz, 2023 yil 31 dekabr kuni AI-80 benzinini aksiz solig‘idan ozod qilishning vaqtinchalik muddati yakunlandi va UNG shoxobchalarida bu markadagi benzin narxi 6050 so‘mdan 6800 so‘mga ko‘tarildi. Xususiy shoxobchalarda narxlar bundan yuqoriroq.

Kun.uz avvalroq xabar berganidek, Energetika vazirligi xususiy AYoQShlarda AI-80 benzini narxini 8000 so‘mdan oshirmaslik bo‘yicha huquqiy mexanizm joriy etish yuzasidan hukumatga taklif kiritgan.