Юқори октанли бензиндан бошқа ёқилғилар учун акциз солиғи ставкалари ўзгаради

Бу – 2024 йилги давлат бюджети қонуни қабул қилиниши муносабати билан Солиқ кодексига киритилган ўзгаришларда кўрсатилган.

Иқтисодиёт ва молия вазирлиги 2023 йил охирида эълон қилинган Бюджетномада фақат АИ-80 бензинига акциз солиғи индексация қилинаётганига тўхталиб, буни “аҳоли саломатлигига салбий таъсирларни камайтириш ва табиатга келтириладиган зарарларни қисқартириш мақсади” билан изоҳлаган эди.

АИ-91 ва ундан юқори октанли бензин маҳсулотлари эса евростандарт талабларига жавоб бериши сабабли уларга нисбатан амалдаги ставка ўзгаришсиз қолиши билдирилган.

Бироқ АИ-91 бензинидан ҳам кўра экология учун зарарсизроқ ёқилғи турлари – суюлтирилган (пропан) ва сиқилган (метан) табиий газ учун акциз солиғи оширилаётганига изоҳ берилмаган.

Вазирликка кўра, акциз солиғидаги бу ўзгаришлар АИ-80 бензини нархининг 1 фоизга ёки 88 сўмга ошиши, метан нархи эса 3 фоиз ёки 84 сўмга ошишига олиб келади.

Эслатиб ўтамиз, 2023 йил 31 декабр куни АИ-80 бензинини акциз солиғидан озод қилишнинг вақтинчалик муддати якунланди ва UNG шохобчаларида бу маркадаги бензин нархи 6050 сўмдан 6800 сўмга кўтарилди. Хусусий шохобчаларда нархлар бундан юқорироқ.

Kun.uz аввалроқ хабар берганидек, Энергетика вазирлиги хусусий АЁҚШларда АИ-80 бензини нархини 8000 сўмдан оширмаслик бўйича ҳуқуқий механизм жорий этиш юзасидан ҳукуматга таклиф киритган.