BMT dunyo aholisini eng ko‘p qaysi muammolar xavotirga solayotganini aniqladi

 Yer aholisini eng ko‘p global isish, nizolar va diskriminatsiya xavotirga solmoqda. Bu haqda YuNeSKO o‘tkazgan so‘rov natijalariga tayanib BMT yangiliklar xizmati xabar qildi.

Xabarda aytilishicha, "Dunyo 2030 yilda" deb nomlangan so‘rovda 15 ming kishi ishtirok etgan.

 So‘rovda qatnashganlarning 67 foizi global isish hamda o‘simliklar va hayvonot olamining yo‘qolib borayotganidan tashvish bildirgan.

Sayyora aholisining fikricha, ikkinchi o‘rindagi muhim muammo – bu nizolar va zo‘ravonlik. Muhimligi jihatidan diskriminatsiya va tengsizlik uchinchi, suv, oziq-ovqat va uy-joy yetishmasligi muammolari to‘rtinchi o‘rinda joylashdi.

So‘rov ishtirokchilarining aksariyati global muammolarning yechimi yaxshi ta'lim olish deb hisoblaydi. Shuningdek, ko‘pchilik global muammolarni hal qilishda xalqaro hamkorlik muhim ekanligini bildirgan. Ammo so‘rovda qatnashganlarning 25 foizigina mamlakatlar bir-biri bilan kelisha olishiga ishonadi.