Microsoft shaxsiy foydalanuvchilar ma'lumotlarini taqdim etmaydi

Microsoft korporatsiyasi AQSh davlat organlariga Irlandiyadagi serverlarida saqlanuvchi va mijozlariga tegishli shaxsiy ma'lumotlarni taqdim etishi shart emas, deya xabar qilmoqda Reuters agentligi Nyu York ikkinchi okrugi apellyatsiya sudi qaroriga asoslangan holda. 

Apellyatsiya sudi 2014 yili quyi sud mahkamasi chiqargan qarorni asossiz sifatida baholab, Microsoft arizasini qanoatlantirdi. Avvalgi sud qaroriga ko‘ra, kompaniya AQSh hukumati tomonidan mijozlarning shaxsiy ma'lumotlarini taqdim etish talabini bajarishi shart edi. Aks holda, tintuv va boshqa qonuntalablarini buzgan deb topilib, jazoga tortilishi belgilab qo‘yilgandi. 

Aprel oyida Microsoft AQSh hukumati ustidan yuqori sud mahkamasiga arz qilib, mijozlarni hukumat so‘rovidan ogohlantirish huquqini talab qildi. Kompaniya fikricha, AQSh hukumati va federal xavfsizlik organlari, foydalanuvchilarning elektron maktublari hamda boshqa ma'lumotlarini taqdim etishni so‘rashda mijozlarni ogohlantirmaslikni shart qilish bilan mamlakat Konstitutsiyasini buzmoqda. 

Teglar: Microsoft, AQSh, Irlandiya, shaxsiy ma'lumot