Qirg‘izistonda shartli "terrorchilar" yo‘q qilindi

ShHTga a'zo davlatlarning xalqaro aksilterror mashg‘ulotlarida ishtirok etayotgan birlashgan qo‘shinlari qo‘mondonlik tomonidan qo‘yilgan topshiriqlarni bajargan. Ular Qirg‘izistonda bo‘lib o‘tayotgan "Tinchlik missiyasi-2016" mashg‘ulotlari doirasida shartli "terrorchilar"ni yo‘q qildi, deb xabar qilmoqda Markaziy harbiy okrug matbuot xizmati. 

Xabar qilinishicha, o‘quv mashg‘ulotlarining terrorchilarni yo‘q qilish sahnasida qo‘shma kuchlarning front va hujum aviatsiyasi ham qatnashgan. Xususan, Rossiya va Xitoyning Su-24 va "Tszyan-Xun-7" bombardimonchi samolyotlari hamda Mi-8MTV va "Chji-9" vertolyotlari xizmatidan foydalanilgan.

"Tinchlik missiyasi-2016" Qirg‘izistonning Issiq ko‘l viloyati hududidagi tog‘li mintaqada bo‘lib o‘tmoqda. U, 21 sentabrgacha davom etadi. O‘quv mashg‘ulotlarida Qozog‘iston, Qirg‘iziston, Xitoy, Rossiya va Tojikiston Qurolli kuchlari ishtirok etmoqda.