“Urganch-Xiva” temir yo‘l liniyasining qurilishi boshlandi

O‘zbekistonda “Urganch-Xiva” temir yo‘l liniyasining qurilishi boshlandi. Bu haqda Xorazm viloyati hokimiyati xabar berdi.

Viloyat ma'muriyati ma'lumotiga ko‘ra, O‘zbekiston Prezidenti Shavkat Mirziyoyev 27-28 yanvar kunlari viloyatga tashrifi davomida loyihani amalga oshirish haqida topshiriq bergan.

Prezident tashrif davomida Urganchdan Xivaga temir yo‘l liniyasini o‘tkazish hamda Xiva shahrida zamonaviy vokzal qurish, shuningdek, elektropoyezdlar harakatini, kelajakda esa Afrosiyob tezyurar poyezdi harakatini yo‘lga qo‘yish lozimligini alohida ta'kidlab o‘tdi. 

Temir yo‘l liniyasini ishga tushirish mintaqadagi yo‘lovchi va yuk tashishlar salohiyatini oshiradi, deb ta'kidlashgan hokimiyatda.