Inson huquqlari bo‘yicha Oliy komissar O‘zbekistonni alohida ta'kidlab o‘tdi

BMTning inson huquqlari bo‘yicha oliy komissari Zayd Raad al-Husayn butun dunyodagi inson huquqlari bilan bog‘liq vaziyat haqidagi hisobotida O‘zbekistonning yutuqlarini ta'kidlab o‘tdi, deb xabar bermoqda BMT radiosi.

Uning so‘zlariga ko‘ra, yangi prezident odil sudlov tizimi samaradorligini oshirish, adolatli va mustaqil sud jarayonlarini ta'minlashga qaratilgan qonunlarni qabul qilmoqda.

"Yaqinda, oktabrda huquq sohasidagi islohotlar haqidagi qonunda sudlar mustaqilligi va odil sudlov jarayonlari shartlari ifodalab berildi. Mazkur qonunlarning joriy etilishi - butun O‘zbekiston xalqi uchun kelgusidagi ijobiy o‘zgarishlar borasida muhim ahamiyat kasb etadi", - dedi Zayd Raad al-Husayn.

Uning fikricha, qator mahkumlar, jumladan, 18 yildan buyon qamoqda bo‘lgan jurnalist Muhammad Bekjonovning ozodlikka chiqarilishi qabul qilingan qonunlarning amaliy natijasidir.