Abdulaziz Komilov hindistonlik hamkasbiga maktub yo‘lladi

O‘zbekiston Respublikasi Tashqi ishlar vaziri Abdulaziz Komilov Hindiston Respublikasi Tashqi ishlar vaziri Sushma Svarajga maktub yo‘lladi. 

“Siz va butun hind xalqini muhim yubiley sana – O‘zbekiston Respublikasi va Hindiston Respublikasi o‘rtasida diplomatik munosabatlar o‘rnatilganining 25 yilligi bilan chin dildan tabriklashdan mamnunman”, - deyiladi maktubda.

Komilovning qayd etishicha, 25 yil davomida tomonlarning izchil sa'y-harakatlari natijasida o‘zaro hurmat, ishonch va bir-birining manfaatlarini hisobga olish tamoyillariga asoslangan uzoq muddatli va ko‘p qirrali hamkorlik yo‘lga qo‘yilgan.

“Joriy yilning 23-mart kuni Nyu-Dehli shahrida tashqi ishlar vazirliklari o‘rtasida bo‘lib o‘tadigan siyosiy maslahatlashuvlarning navbatdagi raundi ikki davlat hamkorligiga qo‘shimcha turtki berishiga hamda uzoq muddatli O‘zbekiston-Hindiston strategik sherikchiligining yangi yo‘nalishlarini belgilab olishga imkon berishiga qat'iy ishonch bildiraman”, - deyiladi maktubda.

Abdulaziz Komilov Sushma Svarajga mustahkam sog‘lik, baxt va davlat lavozimidagi faoliyatiga ulkan zafarlar tilagan.