Filippin prezidenti Rodrigo Duterte Rossiya va Xitoy kemalari uning mamlakati hududiy suvlariga kirib kelishi va bu yerdan vaqtinchalik turargoh sifatida foydalanishi mumkinligini ma'lum qildi. U ushbu davlatlar bu haqda Filippin harbiy-dengiz kuchlari va tashqi ishlar vazirligini avvaldan ogohlantirishi kerakligini ham eslatib o‘tdi, deb xabar bermoqda Bloomberg agentligi.
Davlat rahbarining so‘zlariga ko‘ra, u Xitoydan Janubi-Xitoy dengizidagi Skarboro (Xuan'yan) rifi hududida qurilish olib bormaslik haqida kafolatlar olgan, bu yer ikki davlat o‘rtasidagi bahsli hudud sanaladi. "Bizning do‘stligimiz hurmati ular buni bas qiladilar", - deya Filippin prezidentining so‘zlarini keltiradi agentlik.
Pekin bir necha o‘n yillar davomida Osiyo-Tinch okeani hududi davlatlari bilan Janubi-Xitoy dengizidagi bir qator orollar kimga tegishli ekani borasida bahs olib boradi. Gap Sisha arxipelagi (Parasel orollari), Nansha orollari (Spratli) va Xuan'yan (Skarboro rifi) haqida boradi. Bu bahsga u yoki bu darajada Vetnam, Bruney, Malayziya va Filippin aralashib qolgan. Eng katta bahslar orollarda Xitoy obektlarining qurilishi bilan bog‘liq.
2016 yilning iyulida Haagadagi xalqaro arbitraj qaroriga ko‘ra Xitoy Janubi-Xitoy dengizidagi bahsli orollarga “tarixiy huquqlari” yo‘q deb tan olindi. Pekin sud qarorini tan olmasligi hamda u yuridik kuchga ega emasligi haqida ma'lum qilgan.
