NATO sun'iy yo‘ldosh va kompyuter dasturlariga 3 mlrd yevro ajratadi

NATO o‘zining sun'iy yo‘ldosh dasturlarini takomillashtirish va kompyuter texnologiyalarini rivojlantirish, shu jumladan kibernetika himoyasini yaxshilashga 3 mlrd yevro miqdorida mablag‘ sarflashni rejalashtirmoqda. Bu haqda Reuters agentligi xabar qilmoqda.

Ma'lumotlarga ko‘ra, 1,7 mlrd yevro qo‘shinlar, kemalar va dronlarni yaxshiroq qo‘llab-quvvatlash maqsadida sun'iy yo‘ldosh aloqa ishlariga sarflanadi. Yana 800 mln yevro evaziga RQM (raketalarga qarshi mudofaa) va HHH (havo hujumidan himoya)ga mas'ul kompyuter tizimlari takomillashtiriladi. 71 mln yevro kibertahdidlarga qarshi yo‘naltiriladi.

NATO bosh kotibi Yyens Stoltenberg alyansning 2016 yilga doir hisobotida qayd etishicha, tashkilotga a'zo 27 davlatning AQShdan tashqari mudofaa maqsadlariga sarflagan mablag‘i YaIMning 3,8 foizini tashkil etgan va 2015 yil bilan taqqoslaganda 1,47 foizga ko‘proq bo‘lgan. AQShning 2016 yilda NATO uchun sarflagan mablag‘i 45,9 foizdan iborat bo‘lgan. NATOning 28 mamlakati 2016 yilda jami 892 mlrd dollar yo‘naltirgan.