Pxenyan: yadro urushi istalgan vaqtda boshlanishi mumkin

Shimoliy Koreyaning BMTdagi doimiy vakili o‘rinbosari  Kim In Ryon AQSh tufayli yadro urushi istalgan lahzada boshlanishi mumkin, deb aytmoqda. Bu haqda RIA “Novosti” axborot agentligi xabar bermoqda. 

Kim In Ryonning aytishicha, AQSh Koreya yarimorolida yadro urushiga olib kelishi mumkin bo‘lgan xavfli vaziyatni vujudga keltirdi. Uning aytishicha, bu tinchlik va barqarorlikka jiddiy xavf soladi.

"Shimoliy Koreya amerikaliklar istayotgan har qanday harbiy rejalarga javob berishga tayyor", deb aytdi diplomat.

Uning ta'kidlashicha, Shimoliy Koreya o‘z rahbariyati lozim deb topgan istalgan vaqtda yadro sinovini o‘tkazishga tayyor.

Avvalroq AQSh prezidenti Donald Trampning matbuot kotibi prezident Shimoliy Koreyaga nisbatan amalga oshiradigan harakatlarini oshkor qilmasligini aytgandi.