O‘zbekistonda issiqlik ta'minoti tizimini rivojlantirish dasturi qabul qilinadi

O‘zbekiston Respublikasi prezidentining «2018–2022 yillarda issiqlik ta'minoti tizimini rivojlantirish dasturi to‘g‘risida”gi qarori e'lon qilindi.

Qaror matniga ko‘ra, iste'molchilarga issiqlik energiyasi yetkazib berish sifatini oshirish va uzluksizligini ta'minlash chora-tadbirlarini izchil amalga oshirish, zamonaviy tejamkor va energiyani iqtisod qiladigan texnologiyalarni joriy etish asosida issiqlik ta'minoti tizimining asosiy fondlarini yangilash va modernizatsiyalash, yoqilg‘i-energetika resurslaridan samarali va oqilona foydalanish maqsadida quyidagilar respublikada issiqlik ta'minoti tizimini yanada rivojlantirishning ustuvor vazifalari etib belgilangan:

- issiqlik ta'minoti tizimiga energiya va resurslarni tejaydigan yangi texnologiyalar va uskunalarni, shu jumladan, qayta tiklanadigan energiya manbalaridan foydalangan holda joriy etish;

- energiya samaradorligi yuqori bo‘lgan mahalliy qozonxonalar qurish, shuningdek, xonadonlarga yakka tartibda ichki issiqlik ta'minoti tizimini o‘rnatish yo‘li bilan ko‘p xonadonli uy-joy fondi, ijtimoiy va boshqa obektlarning nomarkazlashtirilgan issiqlik ta'minoti tizimini rivojlantirish;

- jismonan va ma'nan eskirgan, tejamkor bo‘lmagan qozonxona agregatlarini almashtirgan holda ishdan chiqqan magistral va taqsimlash issiqlik tarmoqlarini modernizatsiya va rekonstruksiya qilish ishlarini amalga oshirish;

- energiya resurslari iste'mol qilinishi va ishlab chiqarilishining me'yor bo‘yicha hisobga olinishini tashkil etish, iste'molchilarning issiqlik ta'minoti xizmati haqini hisoblash va to‘lashning avtomatlashtirilgan hisob-kitob tizimini joriy etish;

- noishlab chiqarish xarajatlari o‘sishiga yo‘l qo‘ymaslik va issiqlik energiyasini yetkazib berish, taqsimlash va iste'mol qilishda me'yoridan ortiqcha nobudgarchiliklarni kamaytirish hisobiga sarf-xarajatlarni qisqartirishga yo‘naltirilgan issiqlik ta'minoti tizimida yagona texnik siyosatni amalga oshirish.

Qarorga ko‘ra 2018–2022 yillarda issiqlik ta'minoti tizimini rivojlantirish dasturi tasdiqlanadi va  u quyidagilarni o‘z ichiga oladi:

- 2018–2022 yillarda mahalliy qozonxonalarni modernizatsiyalash va rekonstruksiya qilish;

- 2018–2022 yillarda energiya samaradorligi yuqori bo‘lgan mahalliy qozonxonalar qurish, jumladan, gelioqurilmalarni qo‘llash;

- 2018–2022 yillarda markaziy qozonxonalarni modernizatsiyalash va rekonstruksiya qilish;

- 2018–2022 yillarda issiqlik tarmoqlarini modernizatsiyalash va rekonstruksiya qilish;

- 2018–2022 yillarda xonadonlarga yakka tartibda ichki issiqlik ta'minoti tizimini o‘rnatish;

- 2018–2022 yillarda issiqlik ta'minoti tizimini rivojlantirish kompleks tadbirlari.

Qarorda tasdiqlanadigan Dasturni amalga oshirishni moliyalashtirish manbalari ham ko‘rsatib o‘tilgan.

Qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari – “O‘zbekiston temir yo‘llari” aksiyadorlik jamiyati boshqaruvi raisi A.J.Ramatov zimmasiga yuklandi.