Manchester janubida maxsus amaliyot o‘tkazilmoqda

Politsiyaning maxsus bo‘linmalari Manchester shahri janubidagi uylardan birida maxsus amaliyot o‘tkazdi. Bu haqda Manchester Evening News xabar tarqatdi.

Nashrning yozishicha, huquq-tartibot organlari xodimlari Felloufild tumanidagi uylardan biriga kirishdan avval portlash sodir etishgan.

Bundan oldingi xabarlarda stadiondagi terakt bo‘yicha tekshiruvlar doirasida 23 yoshli shaxs qo‘lga olingani haqida aytilgandi.

Mamlakat bosh vaziri Tereza Mey Manchesterda terakt sodir etgan terrorchi shaxsi aniqlanganini ma'lum qilgan. Terrorchining ismi tergov manfaatlari yuzasidan hozircha oshkor qilinmadi.

Manchester politsiyasi Manchester Arena stadionida 22 may, dushanba kuni sodir bo‘lgan portlashdan so‘ng kuchaytirilgan rejimda ishlamoqda. So‘nggi ma'lumotlarga ko‘ra, stadiondagi portlash oqibatida 22 kishi halok bo‘lgan, 59 kishi jarohatlangan. Bundan tashqari, bir necha bola bedarak yo‘qolgan.