AQSh kongressida Trampga impichment e'lon qilishga tayyorgarlik ko‘rilmoqda

AQSh kongressi vakillar palatasi a'zosi El Grin AQSh prezidenti Donald Trampga impichment e'lon qilishga ilk urinishga materiallar to‘plamoqda. Bu haqda The Hill nashri xabar bermoqda. 

Kongressmen Grin Trampga qarshi ayblovlarni 7 iyundayoq taqdim qilmoqchi.

Nashr ma'lumotlariga ko‘ra, Grinning Trampni prezident lavozimidan olib tashlashga urinishi muvaffaqiyatli tugashiga imkoniyat juda kam, chunki kongressning ikkala palatasi ham respublikachilar tomondan nazorat qilinadi. Trampning partiyadoshlari u bilan ba'zi ziddiyatlarga ega bo‘lsalar-da, umuman olganda uning harakatlarini qo‘llab-quvvatlaydilar va u bilan umumiy qarashlarga egalar.  

Grinning fikricha, Trampni iste'foga jo‘natish uchun uning FQBning sobiq direktori Jyeyms Komini lavozimidan bo‘shatish qarori sabab hisoblanadi.